أنس العمري – كود///

فقضية شبهة اغتصاب محامية فرنسية فكازا، تجبدات الكثير من التفاصيل على قصة ما حدث ففيلا كازا، لي كانت مسرح للوقائع التي وردت في الشكاية لي دارتها الضحية وخطيبها. كما أنه بانت بعض المعطيات التي تحدثت عن مدى التورط المحتمل لولاد الملايرية الثلاثة، بنيس ولعلج والسلاوي، فالارتكاب المفترض لهاد الجريمة، والذين تقرر إيداعهم سجن عكاشة على خلفية البحث المنجز فهاد الملف، ولي بداتو الفرقة الوطنية للشرطة القضائية. لكن لي ما تعرفش شكون هو وعلاقتو بهادشي، هو المشتبه فيه الرابع لي بدوره هبط لعكاشة.

نبشنا ف”كود” فوقائع هاد القضية وقدرنا نتعرفو عليه. المعلومات كتفيد بأنه مستشار جماعي فكازا عن حزب معارض =الحركة الشعبية=. متزوج وأب لطفلة. اسمه احمد الدغبر. وحسب ذات المعطيات، فإن المعني بالأمر بدا الاشتغال مع عائلة بنيس ابتداء من سنة 2011.

وفالليلة، لي وقائعها موضوع البحث، كلف، حسب ما توصلت إليه “كود”، باش يأمن الحفل لي دارو ولد بنيس، ولي وصل عدد المدعوين ليه 100 شخص. وذلك من خلال تأمين قاعة الضيوف والمسبح ومحيطه.

ولي خلاه يتجبد فهاد الملف، هو أن خطيب المحامية الفرنسية كيتهم هاد المستشار بأنه عرضه للعنف والضرب بتحريض من مشغله. وهو ما ينفيه المعني بالأمر جملة وتفصيلا، حسب ما توصلت علمته “كود”.

تصورو مستشار جماعي كيخدم كارد كور. مصوتين عليه الناس باش يخدمهم وهو حارس خاص لملايري. شوفو فين وصلات السياسة. دابا راه متابع فقضية خايبة وفحالة اعتقال.

هاد دغبر عندو 39 سنة ما عندوش الباكالوريا. خدم فريسطورات قبل ما يولي كارد كود. من 2011 وهو خدام مع عائلة بنيس. حارس شخصي ليه ولكن باسم شركة مأسسها مع شي حد اخر. دابا راه مستشار جماعي بمقاطعة سباتة وگارد كور للملايري بنيس.