كود كازا ///

“اتصالات المغرب” غادية فالخسران مع محمد بنشعبون. نهار جابو وزير المالية الأسبق لرئاسة مجلس إدارة الفاعل التاريخي للاتصالات فالمغرب واللي مازال كتملك الدولة فيه أسهم، وهي اللاور اللاور.

دارت تحالف غريب مع “انوي” باش يطلقو عروض وهادا كيضرب فالمنافسة. شفنا مجلس المنافسة ضرب الطم على هاد التحالف المضر بالمستهلك.

اليوم تخلى بنشعبون على لون الهوية التاريخية لـ”اتصالات المغرب” اي اللون الأزرق ورجعو حمر. تصورو يكون عندك اللون الازرق المريح الزوين وتحولو للأحمر القوي العنيف.  طبعا باش يغمقو علينا صحاب هاد التخربيقة قال ليك لون “التجديد والتأكيد” وزادو بغاو يصطحونا بعبارة لون العلم المغربي.

هاد الشي قال ليك باش يطلقو الجيل الخامس “5 جي”

بنشعبون تحول بمونيكا بيد “انوي”. ما بقاش شخصية عند “اتصالات المغرب”. هادي راه مازال الدولة عندها فيها أسهم، اي ديال لمغاربة

تجيب بونو او غيرو ما غاديش يغير الواقع. واقع ان بنشعبون طيح بهاد الفاعل التاريخي. مرمدو. خاصو يحمر لوجه ماشي يبدل الازرق بالأحمر