كود سبور//

كشفت تقارير إعلامية إسبانية أن النجم المغربي إبراهيم دياز غيبقى مع ريال مدريد الإسباني، واخا العروض القوية اللي عندو وواخا يجي الفرنسي كيليان مبابي للريال مدريد.

ووضح موقع DenfensaCentral اللي مهتم بريال مدريد وبأي حاجة متعلقة بالفريق الإسباني، أن ابراهيم ديال غيبقى مع الريال واخا العروض اللي عندو وأبرزها من تشيلسي النگليزي اللي باغي يعطي 60 مليون أورو باش يسني معه.

وقال نفس الموقع، بناء على مصدر قريب من ابراهيم دياز، إن النجم المغربي قال للمحيط ديالو أنه ما غيمشي لحتى شي فريق آخر، واخا العروض المغرية اللي عندو، وأنه غيبقى فريال مدريد وأنه ما باغيش يمشي من أحسن فريق فالعالم، وقال لهم أن الحلم هذا هو الحلم ديال وهو يكون فالريال.

وأما بالنسبة لريال مدريد، فوضح الموقع أنهم وبرئاسة فلورنتينو بريس عاجبهم إبراهيم دياز، وصعيب يفكرو فأنهم يخليوه يمشي والأكثر من هذا الشي فريال مدريد ما باغينش يخليو حتى شي مهاجم يمشي حيث المهاجمين كاملين اللي كاينين دابا داخلين فالبروجي ديالهم للمستقبل.