كود سبور- وجدة//

عبر الدولي المغرب ابراهيم دياز على الفرحة ديالو بالرباح اللي حقق المنتخب المغربي على تنزانيا بنتيجة 2 لزيرو ضمن إقصائيات كأس العالم 2026، وعلى السعادة ديالو حيث كايلعب فالمغرب وقال إنه عاجبو الحال حيث كايلعب فبلادو وقدام الجمهور المغربي.

وهضر دياز ملي سالا ماتش المغرب وتنزانيا اللي ماركا فيه الهدف الثاني للمنتخب المغربي، وقال: “كان الماتش صعيب حيث رجعو اللور وحاولنا نماركيو عليهم، وبشكل عام درنا ماتش مزيان ولعبنا بطريقة مزيانة وأنا فرحان بقدرات المنتخب المغربي، وراني فرحان بزاف حيث ربحنا وهذا الشي اللي بغيت”.

وزاد ابراهيم دياز، وقال: “أي رباح راه مزيان لينا قبل كاس أفريقيا 2025، اللي لاعبينو عندنا فبلادنا، وصحابنا وعائلاتنا كاينين معنا هنا والجمهور زوين بزاف، وأنا فرحان بزاف حيث كانلعب هنا، وملي كانلعبو هنا فبلادنا الرباح كايكون ساهل حيث الجمهور كايعاونا وحنا عندنا بزاف من الإمكانيات وبغينا نكونو واجدين لكاس أفريقيا باش نفرحو جمهورنا”.