كود سبور//
عبر الدولي المغربي ابراهيم دياز على الفرحة ديالو حيث جا تاني المنتخب الوطني المغربي، وخا بقى فيه الحال حيث ما غايلعبش الجوج ماتشات الجايين ضد تونس والبنين بسبب الإصابة، وعبر على الحب ديالو للجمهور المغربي اللي كايبغيه وواعدهم بلي غايعطي گاع اللي عندو باش يفرحهم.
وقال ابراهيم دياز فتصريح للموقع الرسمي للجامعة الملكية المغربية لكرة القدم: “العام كان مزيان ولكن كانت صعيبة بزاف، وراني فرحان حيث أنا هنا فالمنتخب المغربي، وكيف كانقول ديما هادي الدار ديالنا وعائلتنا داكشي علاش أنا فرحان”.
ووضح ابراهيم دياز: “صعيب عليا الحال حيث ما غانقدرش نلعب الماتشات بجوج اللي جايين، ولكن راني هنا باش نشجع المنتخب وحنا مرتاحين هنا وأنا فرحان حيث كاين هنا مع اللاعبين، وديما كانقولها ملي كاتحس بالراحة فشي بلاصة، ولو ما تقدرش تلعب كاتكون فرحان وراني هنا كانتفرج ونلعب ونتدرب، وكانتريني فلاصال باش نوجد راسي نكون فحالة مزيانة وحنا خدامين وكانوجدو مزيان وفرحانين بزاف حيث كاينين هنا فالمنتخب المغربي”.
ووجه ابراهيم دياز ميساج للجمهور المغربي: “كانقول شكرا لجميع المشجعين حيث كايوصلوني رسائل المحبة والتقدير، وكانحس براسي خاصني نعطي بزاف مقابل هذا الشي، وغاندير هذا الشي أكيد وحتى أنا كانبغيكم”.
