كود سبور//

كشفت جريدة “ماركا” الإسبانية، أن النجم المغربي ابراهيم دياز توعت، ضد ريال بيتيس السبت اللي فات ضمن منافسات بطولة الصبليون، وهذا الشي اللي ما خلاهش يكمل الماتش.

وقالت الجريدة الإسبانية القريبة من ريال مدريد، أن كارلو أنشيلوتي مدرب الفريق قرر تغيير ابراهيم دياز بعدما بدا به الماتش ضد ريال بيتيس رسمي، وخرجو فالدقيقة 59، حفاظا على السلامة ديالو حيث حس بشي ألم، بلاما تقول الجريدة معطيات اخرى بخصوص الحالة الصحية ديال النجم المغربي وفين حسب بالألم.

وبالمقابل بان ابراهيم دياز وهو كايتريني البارح الاحد فالتداريب الجماعية لريال مدريد، باش يحيد لعيا ديال ماتش ريال بيتيس، وبدا هو وصحابو كايوجدو لديربي مدريد ضد أتليتكو مدريد غدا الثلاثاء ضمن ثمن نهائي دوري أبطال أوروبا.

وكان ابراهيم دياز ورا هدف ريال مدريد على ريال بيتيس، وعطاهم التقدم فالماتش ملي ماركا فالدقيقة 9، قبل ما يقلبو بيتيس المباراة وماركاو 2 أهداف وربحو الماتش.