كود ـ مراكش//

المحكمة الابتدائية فمدينة مراكش حكمات ليلة، الجمعة 5 دجنبر، بالحبس النافذ فحق ݣزار والمساعد ديالو بتهمة ترويج كميات كبيرة ديال اللحوم الفاسدة وغير صالحة للاستهلاك، واللي كانت غادي تضر صحة المواطنين.

هيأة الحكم عطات عام ديال الحبس النافذ للݣزار اللي المحل ديالو كاين فحي المسيرة، وغرامة مالية قدرها 4000 درهم. والمساعد اللي كان مكلف بالنقل ديال اللحوم اللي ما صالحاش تضرب بـ 4 شهور حبس  وغرامة 1500 درهم.

هاد الأحكام جات فملف كان خلق ضجة فمراكش خلال الأسابيع اللي فاتت، بعدما تم ضبط لحوم فاسدة كانت غادي توصل لكروش المستهلكين بلا مراقبة وبلا احترام أدنى شروط السلامة الصحية.

جزء من الناس شافو فهاد القرار “عقوبة رادعة” وتقدر تكون عبرة، فحين فئة أخرى بقات كتطالب بأحكام أشد قساوة، باش كل واحد سولات ليه نفسو يلعب بصحة المواطنين يعرف باللي القانون ما كيرحمش.