مصطفى المزابي -كود برشيد //

سدات هيئة الجنحي التلبسي بالمحكمة الابتدائية ببرشيد فالساعات الأولى من صباح اليوم الثلاثاء ملف سرقة جثة رضيع من مصحة خاصة بالمدينة، حيث حكمت على مدير المصحة بـ3 أشهر حبسا نافذة و3 أشهر نافذة في حق البلومبي وشهرين حبسا نافذة لأم  الرضيع لي اختفى، وكذلك شهرين حبسا نافذة لوالد الرضيع والحكم ببراءة المسؤول عن الاستقبال بالمصحة .

وجاء قرار المحكمة بعدما ناقشت ملف القضية واستمعات إلى الكلمة الأخيرة للمتهمين غالبهم متابعين في حالة سراح مقابل كفالة مالية، وكذا لدفاع المتهمين، ثم حجز ملف القضية للمداولة، وبعد المداولة تم النطق بالحكم فالساعة الثالثة من صباح هذا اليوم مع الخطية للمتهمين.

تفاصيل هذا الملف كترجع ملي استقبلات مصحة خاصة ببرشيد فتاة حامل ماشي متزوجة فحالة صحية حرجة وبعد تدخل طبي عاجل، ولدات هاذ السيدة وتبين أن الجنين مات فالكرش وفي حالة تشوه كارثية، الطبيب اللي كان كايشرف على الحالة قال باللي الجنين تعرض لمحاولة إسقاط وإجهاض متعمدة، خصوصا ملي لقاو مؤشرات كتدل على أن الفتاة تناولات مادة مجهولة باش تقتل الجنين هادشي كايطرح بزاف دالتساؤلات على الظروف ديال الحادثة والتأثيرات ديالها.

مصدر من برشيد قال بلي المصحة بلغات البوليس لي حضر و عاين هاذ النازلة، وفي اليوم الثاني، صُدم العاملون بالمصحة باختفاء جثة الرضيع الميت من مستودع الأموات التابع للمصحة والمفاجأة الكبيرة هي أن كاميرات المراقبة تم تعطيلها بشكل دقيق واحترافي، حيث لم يتم تشغيلها لمدة خمسة أيام قبل الحادثة اللي وقعات فيها جميع الأحداث الغامضة هادشي كايرجّح فرضية تدخل خارجي مقصود باش يخفي الأدلة أو يطمس معالم جريمة محتملة، تعطيل الكاميرات بشكل محترف كايشير لكون الشخص اللي دار هادشي كان عارف مزيان كيفاش يدير باش مايخليش شي دليل ضدو.

دبا رام الملف تحسم فالمرحلة الابتدائية او مايكنش شي بحث قضائي جديد فيه.