كود – وكالات //
ماتت إيڤانا المرا اللولة ديال الرايس الميريكاني السابق دونالد ترامب، وفعمرها 73 عام.
وفموقع التواصل الاجتماعي الخاص بيه “Truth Social” كتب ترامب: “كانت مرا كَادة ورزينة وزوينة، وعاشت حياة مخيرة وكلها أنسبيراسيون”.
تولدات إيڤانا ترامب، وسميتها الأصلية هي “Ivana Marie Zelníčková”، (تولدات) ف”تشيكوسلوفاكيا” سابقا عام 1949، فالجهة اللي ولات كتسمى دبا جمهورية التشيك.
وتزوجات مع دونالد ترامب ف1977، لكنهم تطلقو من بعد 15 لعام ديال الزواج ف1992، وولدو 3 دالوليدات، هوما دونالد جونيور وإيڤانكا وإريك.
وحسب مصادر وكالة “أسوشيتد برس” فإن البوليس قالو بللي الموت ديال إيڤانا عادية، بعدما لقاوها مغيبة حدا الدروج فدارها اللي فنيويورك.
وكان دونالد وإيڤانا ترامب من الشخصيات المشهورة فنيويورك فالثمانينيات والتسعينيات من القرن الفايت. والطلاق ديالهم دار البوز واهتمو بيه الناس بزاف فداك الوقت.
ومن بعدما تفارقو بدات إيڤانا بيزنيس خاص بيها وخاصة فمجال أدوات التجميل والحوايج والمجوهرات.
