سهام البارودي – كود//

فينما شي واحد خرمز شي تخرميزة و بغا يعطي لتخرميزتو واحد النوع ديال “الحصانة” كايخشي فيها الملك و لا الصورة ديال الملك ! لي بنا شي براكة فالبناء العشوائي و مابغاش يمتثل للسلطة و يهدمها كايعلق تصويرة الملك و يثقلها بالكواش و البوديزات و بدا يغوت حلاقمو خارجين “عاش الملك” ! شي فنان مغتصب حگار ضوسيه موسخ و بغا يدير ترميم البكارة الفنية و الاجتماعية ديالو كايدير تاهوا اغنية و يخشي فيها الملك، لي دار شي كروصة ديال الديسير و احتل الملك العمومي و كرفص عباد الله كايعلق صورة الملك و لي خرّج شي غنية نايحة و مابغاناش نقولو ليه راها نايحة كايخشي فيها الملك ! مهم صورة الملك و سمية الملك بزاف ديال الحسرافة و المخالفين للقانون كايتخباو موراها و حنا راه مغاربة و كانشوفو هادشي كل نهار.

المشكل فالاغنية ديال نعمان الحلو أنه أولا ماشي فبلاصتها، ايه سيدنا عزيز علينا كاملين كانبغيوه و لكن تظاهرة رياضية كبيرة ماعندها حتى شي علاقة بديك الاغنية لي خرج لينا بيها نعمان الحلو و لي كاضر صورة البلاد، واش حنا هوما مصر ديال جمال عبد الناصر و لا العراق ديال صدّام و لا كوريا الشمالية ؟  واش حنا عايشين فالسبعينات فجمهورية الزايير ديال موبوتو سيسيسيكو باش التظاهرة لي بانت نوضو نغنيو عليه ؟ حنا ماشي ديكتاتورية آ سّي نعمان و لا شي جمهورية من جمهوريات الموز !  راه الملك ديال البلاد فاعل سياسي، و انسان بين فمحطات كثيرة انه حداثي الافكار و البلاد فالعهد ديالو عرفات حرية و ديموقراطية اكثر و شفناه مع المغنيين و الرياضيين و المواطنين العاديين كايتعامل بشكل عفوي و طيب ! فما كاين لاش ! ماكاين لاش آ خويا فتظاهرة رياضية تخشيو سميت الملك و صورة الملك !
و ثانيا ديك الاغنية حتى فنيا بعيدة علينا حنا كمغاربة، كلماتها و ألحانها مصرية ميا فلميا، مافيهاش ريحة تامغرابيت، ديال شي عرس فمصر و شي راقصة كاتشطح فنادي الضبّاط، و قديمة و مغبرة فحالا جاية من الستينات ماشي تسمعها فاليوتوب ف2025، خاصك تسمعها فشي راديو مخرشش فإذاعة صوت العرب مورا حرب اكتوبر …

لي كايبغي الملك خاصو يدير الخدمة النقية لي غاتعجب الملك و غاتحمّر ليه وجهو قدام البلدان ! ماشي لي بلز شي بلزة يتخبى مورا صورة الملك !