كود – وكالات //

لبارح السبت، إيلون ماسك خرج بهضرة قوية على الاتحاد الأوروبي وقال خاص “الاتحاد الأوروبي يتلغا وكل بلاد تحكم لراسها”. هاد الهجوم جا بعد غرامة كبيرة فرضاتها بروكسل على منصة X ديالو وللي وصلات 120 مليون يورو.

متحدث باسم المفوضية قال ’’بأن القرارات اللي كتهم الاتحاد الأوروبي كتقررها بروكسل، وبأن الحلفاء كيكونو أقوى مع بعضهم من المعارضة“ وخا أن ماسك ما بقاش عندو دور رسمي فالإدارة الأمريكية، ولكن الصوت ديالو باقي مؤثر، خصوصاً فالقضايا اللي كتهم أوروبا.

ماسك وترامب كيدعمو حرية التعبير حسب رأيهم، وكيهاجمو أوروبا على “البيروقراطية غير المنتخبة والسياسات اللي كتمس حرية التعبير”. نائب وزير الخارجية كريستوفر لانداو زاد قال بأن الأجندة الأوروبية “كتعارض المصالح الأمريكية” وغادية بالقارة لـ”انتحار حضاري”.

من جهة أخرى، بعض المحللين الأوروبيين قالو بأن هاد الهجوم ديال ماسك كيعكس التوترات المستمرة بين القيم الأمريكية والأوروبية، خصوصاً فمجال الرقابة على الشركات الرقمية وحرية التعبير على الإنترنت، كيشوفو بأن هاد النقاش كيعطي صورة على الصراع بين اللوائح التنظيمية الأوروبية اللي كتشد فالشركات الكبرى، والنهج الأمريكي اللي كيركز على الابتكار والحرية الفردية. هاد الاختلافات ممكن تزيد تعقد العلاقات بيناتهم مستقبلا، خصوصاً فمجال التكنولوجيا والاقتصاد الرقمي.

يشار إلى أن الغرامة هي اللولى للي كتفرضها المفوضية الأوروبية بموجب قانون الخدمات الرقمية لمكافحة المحتوى غير القانوني والضار على الإنترنت.