الرئيسية > تبركيك > إيفوارية حطات فيديو كتعاود فيه قصتها ومعاناتها مع التحرش في المغرب..والتعاليق ديال المغاربة كانت متخلفة وعنصرية: رجعي لبلادك اعزية لخانزة
23/02/2020 11:00 تبركيك

إيفوارية حطات فيديو كتعاود فيه قصتها ومعاناتها مع التحرش في المغرب..والتعاليق ديال المغاربة كانت متخلفة وعنصرية: رجعي لبلادك اعزية لخانزة

إيفوارية حطات فيديو كتعاود فيه قصتها ومعاناتها مع التحرش في المغرب..والتعاليق ديال المغاربة كانت متخلفة وعنصرية: رجعي لبلادك اعزية لخانزة

عفراء علوي محمدي- كود//

غير إلى بقيتي متبع التفاعلات والتعليقات على مواقع التواصل الاجتماعي كيمكنليك من خلالها تستنتج بسهولة مدى وعي هذ المجتمع اللي عايشين فيه، ومدى تخلف واحد النسبة كبيرة من أفرادو.

لبارح من بعدما نشرات مهاجرة إفوارية ساكنة فأكادير قصتها مع التحرش، وحكات المعاناة اللي كيعيشوها كَاع العيالات فهذ البلاد وبشكل يومي مع المتحرشين، مجموعة من الناس فليكومونتير بينو على الوسخ اللي معشش ليهم فالدماغ، قالو: “اللي تحرش بهذ الإفوارية خصو الحبس”، و”شكون داها فيك ولا يقدر حتى يقيسك يا العزوة”، “ظفارها كبر من صباعها وقالت ليك التحرش، تلقاها دابا تحرشو بيها هذوك المكبوتين اللي كيجمعو كلشي وتلقاها تصحاب راسها قوقة”، بلا مانساو المتخلفين اللي كيحسابليهم سباب التحرش هو لباس المرأة واللي قالو “تحرشو بيك حيت أنت استفزيتهم بلباسك، وحسن ليك باش تتفاداي هذشي تلبسي اللباس الشرعي لأنك فدولة مسلمة”، وعاد العنصريين اللي قالو ليها “أكبر المتحرشين والنصابة فالعالم هوما الأفارقة السود نوضي جمعي راسك”.

تحرش وعنصرية وسبان وشتم

مجموعة كذلك من المعلقين كانت ردودهم مثيرة للإشمئزاز كثر، من بعد ما طالبوا من المهاجرة الإفوارية ترجع لبلادها إلى كانت هنا كتعاني كيف كتقول، وقالوا ليها “رجعي لبلادك يا العزية الخانزة”، “كون غير بقيتي فبلادك وماجيتيش”، “زعما بغيتي تقولي بللي بلادكم حسن، إيوا رجعي لبلادك”، وكاين فيهم اللي صور ليها رحلات الطيارة اللي كاينين من المغرب للكوديفوار.

عوض المغاربة ما يتعاطفو مع الإفوارية ويساندوها ويضامنو معاها، من بعد ما عانات من التحرش فالواقع، هاهيا دابا كتعاني من العنف الرمزي فمواقع التواصل الاجتماعي، والاستهزاء، والعنصرية، وتخسار الهضرة، وقلة قليلة هم المعلقين اللي وقفوا فجنبها، بحال واحد المعلقة اللي قالت كلام فالصميم: “80 فالمية من المغاربة فهذ البلاد ماعندهمش دراية كبيرة بالجنس حيت عمرهم تلقاو تربية جنسية، وبصراحة الخروج للشارع هو جحيم لكل مغربية، كاينين العنصريين وكاينين المتحرشين اللي كيقضوا مضجعنا كل نهار، وحتى فالفيديو اللي تكلمتي فيه على هذ الواقع ماحشموش، ومازالين زايدين فيه، أنا ننصحك تتجنبي تخرجي بوحدك وتخرجي مع كليكة ظالبنات باش مايزعمو على حتى وحدة فيكم”.

قصة الإفوارية.. المغاربة مامسوقينش

قصة الإفوارية، اللي سميتها مريم، كانت محزنة وأليمة جدا، حكات فالفيديو، اللي نشراتو على “فيسبوك”، قبل ما يتبارطاجا على نطاق واسع فكَاع مواقع التواصل الاجتماعي، كيفاش تهجم عليها واحد السيد، وتبسل عليها، قبل ما يحبس عليها الطريق ويآمرها باش تهضر معاه صحا، هي حاولات تتفاداه لكن السيد راسو قاصح، حتى بدات كاتغوت باش يعتقوها منو الناس، لكن حتى واحد ماداها فيها.

كتقول مريم فالفيديو كذلك بللي حتى هذ الشخص بدا يغوت، وقاليها “شكاتحسبي فراسك تكوني؟ أنا باغي غير نهضر معاك علاش هذ الشوهة كاملة”، على أساس أن هو عندو كامل الحق باش يتحرش بيها وان أي مرا خرجات للزنقة فواجب عليها تذعن لرغبات للمتحرش والكبت ديالو، خصوصا وان الناس اللي كانوا بجنبها تفرجو فداكشي اللي وقع، وماقدر حتى واحد يتدخل باش يفكها، أو ماسوقوش.

الإفوارية مريم حسات بللي هي ماشي فأمان فهذ البلاد، وولات خايفة تخرج للزنقة، خصوصا وانها مشات كتجري تبلغ البوليسي بالمتحرش، لكنه ماتسوقش ليها، بنما هرب المتحرش ومشا بحالو، وهي خافت وشدات طاكسي للدار.

أرقام صادمة

وفعلا معدلات التحرش مرتفعة بزاف فبلادنا، آخر تقرير دولي دارو موقع World Population Review أكد بللي المغرب ثاني دولة عربية فمعدلات التحرش الجنسي و الاغتصاب.

وحسب آخر أرقام صدراتها المندوبية السامية للتخطيط، 6 مليون مرا فالمدن كتتراوح الأعمار ديالهم بين 18 و 64 سنة، تعرضو منهم 2,3 مليون للتحرش، أي 40,6 فمائة تعرضو لفعل واحد على الأقل ديال التحرش او أفعال العنف الرمزي.

لكن هذ الأرقام كتبقى ما دقيقاش بزاف بحكم ان الظاهرة فتزايد مستمر، والناس مطبعين معاها، وقلالين بزاف الشكايات اللي كيحطو العيالات ضد المتحرشين، وحتى التفاعل معاها مكايكونش فالمستوى.

بعض التعاليق الصادمة:

موضوعات أخرى

31/03/2020 10:12

فعز أزمة “كورونا”.. جمعيات الممرضين كتفضح النقص فالأطر الطبية والتمريضية فالمغرب وكتطالب بتوظيف الأطباء والممرضين البطاليين بدون مباراة

31/03/2020 10:00

واش بوعشرين غادي يستافد من العفو زمن كورونا؟ نتمناو. مراتو: قلبي كينبئني باللي جلالة الملك غادي يفرح لكثير ومنهم توفيق