كود – وكالات//

وزير الخارجية الإيراني صرّح اليوم الاثنين بلي بلادو واجدة مزيان سوا الحرب ولا المفاوضات، هاد التصريح جا فواحد الوقت اللي مازال فيه الشارع عامر بالاحتجاجات لي تقمعات من طرف الأجهزة الأمنية، هاد التصريح جا مورا نهار واحد من بعد ما دخلات قوات النظام بالعصا والقرطاس باش تفرّق الناس لي كاعية ولي نتج عليه بزاف د القتلى والإصابات.

من جهة أخرى، الرئيس المريكاني دونالد ترامب قال لبارح بلي القادة الإيرانيين باغيين يحلو قنوات حوار مع الولايات المتحدة، هاد الكلام جا من بعد تهديدات لي دارها فإطار التصعيد ديالو ضد طهران، الرئيس الأمريكي كشف نهار الحد بالليل أن الجمهورية الإسلامية ديال إيران تاصلات مع واشنطن باش يفتحوا مفاوضات على القضية النووية، من بعدما هددات الولايات المتحدة بالتدخل العسكري إلا دارو قمع دموي للاحتجاجات.

ترامب قال: “كيبان لي أنهم عياو من معاملة أمريكا ليهم” وزاد: “يمكن نݣلسو معاهم” هاد التصريحات جات ف نفس الوقت اللي المرشد الأعلى الإيراني علي خامنئي صرح بكلام  ضد واشنطن فالأيام الأخيرة، وخا هكاك ترامب ما استبعدش الخيار العسكري وقال ” إيران بدات كتخطى الخط الأحمر .

حسب نشطاء حقوق الإنسان، تقتلو على الأقل 538 شخص لي مشاركين فالاحتجاجات، منهم 490 متظاهر، وكاين تقارير على اعتقال أكثر من 10600 شخص من طرف السلطات الإيرانية، ترامب هضر حتى على انقطاع الإنترنت اللي فرضو النظام، وقال باللي غادي يهدر مع إيلون ماسك باش يشوفو كيفاش يرجعوه للناس.

اليوم الاثنين، وهو غادي من فلوريدا لواشنطن، قال ترامب: “ديما عندي الجديد على الوضع ف إيران كل ساعة، إلا هاجمات إيران القواعد الأمريكية، غادي تشوفو لي عمرها شافتو.

حسب رويترز الرئيس غادي يدير اجتماع مع كبار المستشارين باش يشوفو خيارات الهجوم، والبيت الأبيض نشر رسالة واضحة على موقع X “عندنا ثلاث نقاط: الله ينصر قواتنا، الله يحفظ أمريكا، وهادي غير البداية”.