كود- وكالات//

أكدات وسائل إعلام رسمية فإيران باللي المرشد الأعلى علي خامنئي تقتل فهجوم لي قالت عليه واشنطن وتل أبيب باللي غادي يبقى مكمل أيام أخرى، الرئيس الأمريكي دونالد ترامب كان صرّح باللي القصف غادي يبقا طول السيمانة ولكن السؤال اللي مطروح شكون غادي يخلف علي خامنئي؟

حسب الدستور الإيراني، مجلس الخبراء اللي فيه 88 رجل دين هو اللي كيختار المرشد الجديد، ولكن حتى لدابا ما كاين حتى إعلان رسمي على الخْليفة ديالو، ولكن شبكة CNN هضرات على الأسماء اللي ممكن تكون مرشحة، حسب خبراء ومحللين:

1- مجتبى خامنئي (56 عام)

الولد الثاني ديال خامنئي، عندو نفوذ كبير وعلاقات قوية مع الحرس الثوري وقوات الباسيج، ولكن توريث الحكم من الأب لولدو ماشي شي حاجة كتفضلها المؤسسة الدينية الشيعية وزيد عليها أنه ماشي من كبار رجال الدين وما عندوش منصب رسمي كبير فالنظام.

2- علي رضا أعرافي (67 عام)

رجل دين معروف وقريب من خامنئي، دابا هو نائب رئيس مجلس الخبراء، وكان عضو فمجلس صيانة الدستور اللي كيشرف على الانتخابات والقوانين، كيترأس حتى نظام الحوزات العلمية، ما معروفش عليه نشاط سياسي قوي، وما عندوش علاقات باينة مع المؤسسة الأمنية.

3- محمد مهدي ميرباقري (60 عام)

رجل دين قاصح وعضو فمجلس الخبراء، كيمثل التيار المحافظ لي متشدد، حسب موقع IranWire، عندو مواقف معادية للغرب وكيشوف باللي الصراع بين المؤمنين وغير المؤمنين حتمي، كيترأس أكاديمية العلوم الإسلامية فمدينة قم.

4- حسن الخميني (فالخمسينات)

حفيد مؤسس الجمهورية الإسلامية روح الله الخميني، وهاد الشي كيعطيه شرعية رمزية ودينية، هو أمين ضريح الخميني، ولكن ما سبقش ليه خدم منصب رسمي كبير، ونفوذو وسط الأجهزة الأمنية محدود، كيتعتابر أقل تشدد من بزاف ديال رجال الدين الآخرين.

5- هاشم حسيني بوشهري (فأواخر الستينات)

رجل دين معروف وعندو علاقة قوية بمجلس الخبراء، وهو النائب الأول لرئيس المجلس، كان مقرب من خامنئي، ولكن الظهور الإعلامي ديالو ضعيف، وما معروفش بعلاقات قوية مع الحرس الثوري.

المشهد فإيران دابا غامض، والقرار النهائي غادي يكون بيد مجلس الخبراء، وسط الروينة  والحرب، مزال ممعروفش  شكون غادي يطلع فبلاصة خامنئي، ليام  الجاية غادي تحسم  فمستقبل النظام الإيراني.