كود -وكالات//

اعترفات السلطات الإيرانية بلسان مسؤول حكومي، بلي 2000 واحد تقتلو تقريبا مني بدات موجة الاحتجاجات لخرة اللي عرفتها البلاد، هاد الاعتراف كان فتصريح نقلاتو صحيفة نيويورك تايمز ووكالة رويترز.

فهاد السياق عبّر فولكر تورك، المفوض السامي ديال الأمم المتحدة لحقوق الإنسان، على الصدمة ديالو من “العنف الخطير” اللي كتمارسو قوات الأمن الإيرانية فحق محتجين سلميين، وقال باللي ما يمكنش لهاد الحالة ديال القمع تبقى ديما، وخص السلطات الإيرانية تسمع لصوت الشعب وللمطالب ديالو بالعدل والمساواة والكرامة.

غرب إيران عرف تشديد أمني ممسبوقش، مني الحرس الثوري غلق مداخل عدد من المدن ودار برجات، خصوصاً فمناطق أذربيجان الغربية وكردستان وكرمانشاه وإيلام. وكتفيد تقارير إعلامية باللي القوات الأمنية كتوقف طموبيلات وكتفتش الناس وكتقلب لهم تلفونات.

زاد الوضع تعقّد مني كان انقطاع كامل ديال الإنترنت والاتصالات، الشي اللي خلا بزاف ديال الإيرانيين معتمدين غير على التلفزة باش يتبعو الأخبار، وبالنسبة لحصيلة الضحايا، كاين تفاوت كبير فالأرقام، ما بين تقديرات رسمية كتقول آلاف، وتقارير حقوقية كتقدّر العدد بأكثر من 10 آلاف قتيل، عاد اعتقال كثر من 10 آلاف واحد.