كود – وكالات //
إيران دارت إعدام علني فحق مصارع شاب سميتو صالح محمدي، اللي مازال عندو غير 19 عام، مع جوج ديال الناس خرين، فإطار حملة قمعية ضد الاحتجاجات اللي وقعات فشهر يناير.
صالح محمدي، اللي كان نجم طالع فرياضة المصارعة من مدينة قم، تعرض لتعذيب قاصح باش يعترف بتهم ثقيلة بحال “محاربة الله”، ومن بعد تنفذ فيه حكم الإعدام بلا ما تكون عندو محاكمة عادلة، الناشط الحقوقي نيما فار وصف هاد الشي بأنه جريمة قتل سياسية واضحة، ووسيلة باش يخوّفو بها الشعب ويستهدفو الرياضيين اللي كيعبّرو على الرأي ديالهم.
حسب الرواية ديال الإعلام الرسمي الإيراني، محمدي وجوج المتظاهرين الآخرين، مهدي قاسمي وسعيد داوودي، متهمين بقتل جوج ديال رجال الشرطة باستعمال السكاكين والسيوف فاحتجاجات يناير، وخا النداءات الدولية باش يتوقف الحكم، السلطات الإيرانية صادقات على الإعدام ونفذاتو.
منظمة العفو الدولية خرجات بانتقادات قوية، وقالت إن المتهمين ما توفرت ليهمش شروط الدفاع، وتعرضو لضغوط باش يعترفو، وزادت أكدت أن المحاكمات كانت سريعة وما فيهاش ضمانات ديال العدالة.
نيما فار شبّه هاد القضية بالإعدام ديال المصارع نافيد أفكاري فـ2020، وطالب اللجنة الأولمبية الدولية ومنظمات المصارعة أنها تعاقب إيران وتمنعها من المشاركات الدولية حتى توقف هاد الإعدامات وتطلق سراح المعتقلين، وتحبس استهداف الرياضيين المعارضين.
وحسب تقارير متداولة، أكثر من 7000 متظاهر تقتلو فاحتجاجات 8 و9 يناير فطهران على يد قوات الأمن، فواحد من أعنف حملات القمع اللي عرفاتها البلاد فهاذ السنوات الأخيرة.