كود -وكالات//

فخطوة تصعيدية خطيرة، علنات وكالة تسنيم الإيرانية، التابعة للحرس الثوري، على سدان مضيق هرمز، لي هو واحد من أهم الطرقان البحرية فالعالم، هاد الإعلان جا مع صداع بين إيران وإسرائيل ومريكان

مضيق هرمز ماشي هو الطريق لي كيدوز منو تقريباً خُمس النفط العالمي يعني كثر من 20 مليون برميل ديال النفط ومشتقاتو لي كيدوزو يومياً، واللي كيمثل تجارة سنوية كتفوت 600 مليار دولار، أي اضطراب فيه كيأثر مباشرة على الأثمنة العالمية، وهاد الشي بان فعلاً حيث طلع ثمن البترول مباشرة من بعد الأخبار.

الدول الخليجية، خصوصاً السعودية والإمارات والكويت والعراق، معتمدين بزاف على هاد المضيق باش يصدّرو النفط ديالهم، خصوصاً لآسيا، الصين، الهند، اليابان وكوريا الجنوبية لي هوما من أكبر المستوردين. بمعنى أن آسيا هي اللي غادي تحس بالضربة الأولى إلا تسد المضيق فعلاً.

أما الولايات المتحدة، وخا ما بقاتش معتمدة بزاف على نفط الخليج مقارنة بالسابق، ولكن أي طلوع كبير فتمنو غادي يضرب الاقتصاد العالمي كامل، بما فيه مريكان وأوروبا.

الخبراء كيشوفو أن إيران تقدر تحبس الملاحة مؤقتاً إلا زرعات ألغام بحرية ولا زودياگات سراع وصواريخ مضادة للسفن. ولكن فالمقابل القوات الأمريكية وحلفاءها يقدرو يرجّعو حركة الملاحة بسرعة إلا وقع تدخل عسكري مباشر.

إغلاق المضيق ما غاديش يضر غير خصوم إيران، ولكن حتى حلفاءها، وعلى راسهم الصين اللي كتعتبر أكبر شراي للنفط الإيراني. وهاد الشي كيخلي بزاف من المحللين يقولوا إن خطوة بحال هادي، إلا دارت، غادي تكون غير ورقة ضغط مؤقتة.

وخا أن بعض الدول الخليجية دارو خطوط أنابيب بديلة باش يتفاداو المضيق، ولكن الطاقة ديالها ما كتكفيش باش تعوض الكميات اللي كدوز من هرمز.

اليوم، العالم كيتسنى واش غادي يكون هاد الإغلاق فعلي وطويل، ولا غير رسالة سياسية، المؤكد هو أن أي فتيلة جديدة فهاد المنطقة الحساسة قادرة تشعل أزمة اقتصادية وعسكرية عالمية ما غاديش توقف غير فالخليج.

https://www.bbc.com/arabic/articles/cx23ed82qd5o