گود سبور//

مكمل السويسري جياني إنفانتينو فالترشح لرئاسة الاتحاد الدولي لكرة القدم لولاية جديدة، واخا الحملة المعارضة له، واللي قايدينها الاتحاد الاوروبي لكرة القدم.

وفتصريح لجياني انفانتينو نشراتو منصة Transfer News Live، اكد رئيس الاتحاد الدولي لكرة القدم شعار حملة الترشح ديالو لولاية جديدة على راس الفيفا وقال: “كرة القدم للجميع فكل بلاصة فالعالم”.

وكمل انفانتينو وقال: “بغينا نعطيو الفرصة لكلشي يحلم ويشارك، وتقليص الفجوة بين الكبار وبقية الأطراف، وهذا الشي اللي غادي نكمل الخدمة فيه”.

محيط جياني انفانتينو كايتهم المعارضين له وعلى رأسهم الاتحاد الأوروبي باحتكار الكورة، وانهم ضد الانفتاح اللي دارتو الفيفا على اتحاد اخرى بحال الاتحاد الافريقي ودول اخرى برا أوروبا، ورفع عدد المنتخبات المشاركة فالمونديال داكشي علاش دايرين عليه الحملة.

وبالمقابل الاتحاد الأوروبي والمعارضين له كايتاهموه بالجشع وانه كايجمع الفلوس، وشدوه من هذا المشروع اللي كان باغي يدير ديال تحويل كاس العالم لشركة وبيع أسهمها، وكايقولو ان الكورة ديال الجمهور وماشي ديالو باش يبدا يبيع ويشري فيها.