كود سبور//

شكر السويسري جياني إنفانتينو الوداد الرياضي حيث شاركو فكأس العالم للأندية “الميريكان 2025″، واخا كانت مشاركة كارثية بكل ما تحمل الكلمة من معنى بالنسبة لجماهير الوداد حيث الفريق ودع المسابقة من الدور الأول وما قدرش يربح حتى ماتش.

ونشر جياني إنفانتينو على إنستغرام، صور للوداد الرياضي من الماتشات اللي لعب فالمونديال، وقال عليهم: “شكرا لكم، مشاركة كتحمل بزاف ديال الحوايج إيجابية لبلدكم العاشق لكرة القدم، وكانتسنا غير إمتى نشوفكم فكأس العالم للأندية.

وتعتبر كلمات جياني إنفانتينو بمثابة دعم معنوي للوداد الرياضي وشكر الجمهور ديالو، بعد المستوى الكارثي اللي بان به الفريق الأحمر فالمونديال، واللي خسر گاع الماتشات ديالو فدور المجموعات بعد خسارة مع مانشستر سيتي ويوفنتوس والعين، وودع المسابقة من الدور الأول حيث احتل المركز الأخير بزيرو نقطة، والسبب فهاد الكارثة هو الرئيس هشام آيت منا اللي الموسم كامل هو عاطيها غير للتسيير العشوائي والصفقات الكارثية ديال اللاعبين وجاب المدرب الجنوب إفريقي رولاني موكوينا وخلاه حتى نهاية الموسم عاد بدلو واخا كان باين من الأول أنه ما صالحش للوداد.