كود الرباط/:

البارح كان واحد الإنزال كبير في القاعة 8 لي احتضنت اجتماع لجنة البنيات الأساسية والطاقة والمعادن والبيئة، ولي كان ضيفها نزار البركة وزير التجهيز والماء، ولي قدم مشروع الميزانية الفرعية ديال الوزارة لي تيقودها برسم السنة المالية لسنة 2024.

النواب الاستقلاليون أغلبهم جاو باش يحضروا، حتى أن أطر والمديرين المركزيين والجهويين والاقلمييين لي جاو من مختلف أقاليم المملكة، ما لقاش البعض منهم فين يجلس.

هذا الإنزال الاستقلالي انتبه ليه بعض نواب الاغلبية، خصوصا الاحرار، وقالوا بيناتهم علاش حنا منين تيكون شي وزير تجمعي، لا نحضر بهذا الكثافة، ونفس بالنسبة لفريق البام لي يا الله شي وحدين قلال لي مواظبين على حضور اجتماعات اللجان.

وبمجرد ما انتهى وزير التجهيز والماء العرض ديالو، وغادر القاعة باشر يركب في طوموبلتو لي كانت في الباركين ديال المؤسسة التشريعية، حتى لقا راسو محاصر من طرف بعض البرلمانيين لي بداو تيساعو ويطالبو بتحقيق بعض المطالب.