كود – كازا ///

قالت جريدة إل باييس، إن المتهم المغربي الرابع ف جريمة بارباتي غادي يدوز، اليوم الاثنين، قدام المحكمة ف أول جلسة منذ الكشف عن خبر توقيفه ف الشهر الفايت بسباب الواقعة اللي طرات ليلة 9 فبراير 2024.

وحسب الصحيفة الإيبيرية، فقد اعترف المعني بالأمر أنه ظل مختبئا ف المغرب لمدة 15 شهر بعد الواقعة، وبسباب ضغط تعقبه من الحرس المدني والتهديدات التي تلقاها ف الأشهر القليلة الماضية من مافيا مضيق جبل طارق، خلاتو يرجع للصبليون برفقة محام، لتسهيل اعتقاله. واتبع الخطوات نفسها اللي دار المتهم الرئيسي، كريم البقالي.

وف تصريحاته للمحققين، اعترف بأنه كان على متن الزورق السريع اللي صدم دورية ضباط الحرس المدني، مضيفا أن الواقعة ماكانتش متعمدة وأن العياء بسباب قضاء ساعات طويلة وسط البحر هو للي خلاهم يصطادمو بزورق دورية الضباط  ف هذيك الليلة.

وصدرت بحق المتهم الرابع الهيشو مذكرة بحث دولية، بعدما أكدت تحقيقات الحرس المدني أنه أحد أفراد طاقم قارب المخدرات الأربعة، كما قدم الشهود السبعة المحميون الذين أدلوا بشهاداتهم أثناء التحقيق هويات ركاب الزودياك.

واعترف كريم البقالي اللي متهم فجريمة بارباتي خلال تقديمه إلى العدالة، أنه هو الشخص اللي كان سايگ الزودياك اللي قتلات 2 ديال ضباط الحرس المدني فـ  فبراير 2024، مؤكدا أنه كان باغي يدير مناورة باش يتجنب يصطادم بالقارب ديال الضحايا.