كود سبور//
بدا الدولي المغربي إلياس أخوماش نجم فياريال الإسباني، المرحلة الأخيرة من العلاج ديالو، باش يقدر يرجع يلعب بعد غياب لأشهر بسبب الإصابة والعملية اللي دار فنوفمبر 2024.
ونشر فياريال الإسباني، فيديو قبل لحظات من ظهر اليوم الثلاثاء، لإلياس أخوماش وهو كايتريني فالتيران وكايدير تمارين رياضية من بينها الجري واللعب بالكورة وتمارين ديال قوة التحمل، وهي أول مرة كايتدرب فيها اللاعب المغربي فالتيران ملي توعت.
وكانت تقارير إعلامية إسبانية، قالت قبل أيام أن النجم المغربي إلياس أخوماش غايبدا فاللول ديال شهر أبريل الجاري المرحلة الأخيرة من برنامج العلاج اللي متبعو بعدما فتح على الركبة ديالو فاش تقطعو له ليگامون فشهر نوفمبر اللي فات.
ومن المنتظر يدوز إلياس أخوماش مدة شهر فهاد التمارين الرياضية الانفرادية فالتيران، ومن وراها يبدا يوجد مع فياريال للموسم الجاي، وباغي يكون واجد باش يلعب معهم المنافسات الأوروبية، ويشارك مع المغرب فكأس إفريقيا وحتى كأس العالم 2026.
