كود كازا//

غادي تحتاضن المدرسة الحسنية للأشغال العمومية فالدار البيضاء الدورة 29 من منتدى “EHTP-Entreprises”، وهادشي غادي يكون ما بين 14 و16 أبريل 2026، فواحد التظاهرة اللي ولات من أهم المواعيد ديال التشغيل بالنسبة للطلبة فالمغرب.

هاد المنتدى كينظموه طلبة المؤسسة، وقدر على مدى أكثر من 28 عام يفرض راسو كأكبر ملتقى طلابي كيجمع بين القراية وسوق الشغل، وكيستقطب شركات كبار وخبراء من مجالات مختلفة.

دورة هاد العام جاية تحت شعار: “المهندس المغربي فاعل في تنمية مجالية متوازنة قائمة على الخبرة التقنية والمسؤولية الاجتماعية”، وهادشي كيبين الدور الكبير اللي ولى كيلعبو المهندسين فالمشاريع الكبرى والتنمية المستدامة.

وكيهدف المنتدى يخلق واحد الفضاء ديال التواصل بين الطلبة والخريجين الشباب مع الشركات، باش يلقاو فرص ديال الخدمة والتداريب، ويطورو مهاراتهم ويقربو أكثر من متطلبات سوق الشغل.

وفي هاد السياق ، فالمنتدى اصبح فرصة مزيانة للتشبيك وبناء علاقات مهنية، فين الشباب يقدرو يتعرفو على آفاق المهن الهندسية، خصوصاً فهاد الفترة اللي كيعرف فيها المغرب تغييرات كبيرة ومشاريع ضخمة.

وأكدو المنظمين باللي هاد المنتدى باقي كيلعب دور مهم فدعم الكفاءات المغربية ومواكبة تطور الهندسة، باش تساهم فتنمية متوازنة ومستدامة.