كود سبور//

فـمشهد جديد كيبين العلاقة لي عند عائلة رونالدو بالطوموبيلات الملاح، نشر كريستيانو رونالدو جونيور، ولد النجم البرتغالي كريستيانو رونالدو، تصويرة فـحسابو فـ”إنستاغرام” وهو حدا طوموبيلتو الجديدة من نوع Lamborghini Urus S .

الولد الكبير ديال النجم البرتغالي عندو غير 15 عام، ولكن ولى اليوم حديث السوشيال ميديا بعدما بان بطوموبيلة من أغلى الطوموبيلات الرياضية فالعالم، الثمن ديالها كيوصل تقريباً 265 ألف أورو.

وحسب الجريدة الإسبانية Marca، الطوموبيلة اللي بان بيها رونالدو جونيور ماشي الموديل الجديد ديال”Urus S”، حيت النسخة ديال 2025 تبدلات شوية، وهاد النسخة اللي عندو باين أنها واحدة من الطوموبيلات ديال باه اللي عطاها ليه كهدية خاصة.

وخا هكاك، رونالدو جونيور ما يقدرش يسوقها بوحدو حتى يوصل 18 عام، وهي السن اللي فـالسعودية كيولّي فيها عندك الحق تسوق بحرية، ولكن يقدر يبدأ من 17 عام برخصة مؤقتة ديال التدريب، غير خاص يكون تحت المراقبة ديال باه.