كود -وكالات //

فاكتشاف أثري جديد، علنات البعثة الأثرية المصرية التابعة للمجلس الأعلى للآثار بلي لقاو كنوز تاريخية مهمة فمدينة إهناسيا بمحافظة بني سويف، جنوب القاهرة، هاد المدينة كانت معروفة قديماً باسم “هيراكليوبوليس ماغنا” او “مدينة هرقل العظمى”، لي كانت عندها بلاصة كبيرة فالتاريخ المصري.

ومن بين أهم الآثار كاينة كتلة حجرية كبيرة منقوش عليها اسم الملك سنوسرت الثالث، واحد من أشهر ملوك الدولة الوسطى، عاد نقوش مرتبطة بالمعبود أوزير، هاد الاكتشاف كيبين الأهمية الدينية اللي كانت عند المدينة عند المصريين القدماء.

البعثة لقات حتى راس تمثال صغير ديال المعبودة أفروديت، إلهة الحب والجمال عند الإغريق، لي مصنوع من الرخام الأبيض ومنحوت بدقة كبيرة، كما تلقاو أجزاء ديال تماثيل وقوالب فخارية كانت كتستعمل فسك العملات يام العصر الروماني، الشي اللي كيعكس الازدهار الاقتصادي اللي عرفاتو المنطقة فداك الوقت.

الحفريات كشفات على بقايا بازيليكة رومانية كبيرة ومعبد قديم، وتبين أن البنّايا فالعصر البيزنطي استعملو أحجار المعبد فبناء المنشآت الجديدة، وبعض الأعمدة اللي مازال واقفة حتى لدابا كيوصل وزنها لـ45 طن، وهاد الشي كيدل على التقدم الهندسي اللي كان موجود فداك العصر.