كود -وكالات //

وكالة الأنباء الإيطالية «أنسا» خرجات، لبارح  الأربعاء، بفيديو كيوثق للحظات الأخيرة فحياة عبد الرحيم فقير، اللي صوراتو كاميرا لاصقة  فالتوني ديال واحد البوليسي.

الفيديو كيبين حتى أن جوج د البوليس اللي كانو حاضرين فالتدخل قالو كلام صادم، فاش كان الضحية كيطلب المساعدة.

«إلا مات، غادي نتفلاو مزيان» و«ما كيهمنيش»، هادو هما العبارات اللي قالوها البوليس، حسب ما كشفات عليه الوكالة، وهما كيثبتو المواطن المغربي اللي عندو 42 عام فالأرض نهار 19 يوليوز اللي فات، فمدينة بولونيا.

هاد التصريحات زادت صدمات القضية، خصوصاً أن عبد الرحيم فقير توفى فهاد التدخل البوليسي(فيديو )

ومن جهتو، البوليسي اللي صدرت منو هاد العبارات قال لوكالة «أنسا»: «بغيت نقدم الاعتذار ديالي لعائلة عبد الرحيم فقير ولجهاز الشرطة اللي كننتمي ليه، على الكلام اللي قلت واللي ما كانش مقبول».

وبعد هاد التصريحات، المحامي الإيطالي فابيو أنسيلمو، اللي كيمثل عائلة الفقير، تقدم بشكاية جديدة لدى النيابة العامة فبولونيا، كيطالب فيها بالتحقيق فجرائم أخطر من القتل غير العمد.

وإلى جانب جوج البوليسيين، تسجلو حتى أربعة متطوعين ديال الصليب الأحمر فالسجلات الأولية للتحقيق. وكان فريق الخبراء سلّم، نهار الثلاثاء اللي فات، للنيابة العامة فبولونيا التقرير النهائي ديال الخبرة الطبية الشرعية والتقنية المتعلقة بوفاة عبد الرحيم فقير.