كود -بني ملال//

عاشت مكاتب التصويت بإقليم بني ملال، اليوم، حركية انتخابية عادية همات سير العملية الاقتراعية، وسط تباين ملحوظ فنسب الإقبال بين المدار الحضري والمناطق القروية، وتنافس كبير بين مختلف الهيئات السياسية.

صناديق الإقتراع كان عندها اقبال كبير من طرف العيالات، اللي قصدو بشكل كبير على مراكز الاقتراع من الساعات اللولا فالصباح.

وبالموازاة مع هذا الحضور النسائي القوي، عرفات شوارع المدينة حركة كبيرة من طرف صحاب الطاكسيات الصغيرة، التي تحولات لوسيلة النقل الرئيسية لتسهيل تنقل الناخبين لي كايجيو غالبا لمراكز التصويت.

فالمجال الحضري رصدات كود هدوء نسبي بالمدينة مقارنة بالفيلاجات على مستوى المشاركة، اللي عرفات كثافة قوية وإقبال كبير فالتصويت من طرف الساكنة لي كتجي بشكل جماعي لمكاتب الاقتراع فوق البيكوبات، الشي لي كيعكس الأهمية ديال الانتخابات فالأوساط القروية بالإقليم.

أما نسبة المشاركة بمكاتب الاقتراع بمدينة قصبة تادلة، وصلت ل 26 % بخصوص احصاءات الساعة الرابعة ديال العشية، ” في انتظار شنو غادي تبين محاضر الفرز النهائي ومواقف الصناديق.

بالنسبة ساكنة آيت عبدي بإقليم أزيلال (اللي فيها دواوير بحال تفراوت، تيناتمين، أوجا، وزركان) قرروا يقاطعوا الانتخابات التشريعية وداروا مسيرة احتجاجية نهار الاقتراع.

سبب الاحتجاج هو عدم الاستجابة لمطالبهم الاجتماعية والتنموية لتطوير المنطقة والتجاهل اللي كيعانيو منو ومكاتب التصويت تما خاوية تقريبا من المصوتين.

قبل نهار التصويت،  الساكنة صيفطوا طلب مكتوب للكاتب العام د عمالة أزيلال باش يعلموه بالمقاطعة، وطلبو من السلطات ما يصيفطوش المقدمين والشيوخ للدوائر المعنية تفادياً لأي صداع ولا احتكاك مع الناس.

هاد القرار جاو بيه بعد اجتماع داروه فـ 14 شتنبر فقيادة زاوية أحنصال وطرحوا فيه مشاكلهم، ولكن حيت ما تحلتش قرروا يديروا المقاطعة والاحتجاج فالتيران.