كود -عثمان والشرقي//

تعرضات الشيخة أسمهان لإصابة صعيبة مني كانت خدامة فواحد السهرة فنية فهاد الويكاند، الفحوصات الطبية الأخيرة أكدات إصابتها بتمزق فالرباط الصليبي، ولي هي وحدة من أصعب الإصابات فعالم الشيخات، واللي كتطلب علاج دقيق وفترة غياب طويلة على الميادين .

ونظراً لخطورة هذه الإصابة، خرجات نداءات من الجماهير والأوساط الفنية كتنادي بضرورة تدخل الفريق الطبي المتخصص التابع لأكاديمية محمد السادس لكرة القدم، ولي معروف بالكفاءة والخبرة والمعدات الطبية المتطورة اللازمة للإشراف على حالة الشيخة أسمهان من أجل ضمان نجاح العملية الجراحية وتلقي أفضل رعاية صحية ممكنة لإعادة بنائها البدني .

وبسبب هذه الإصابة، غادي تغيب الشيخة أسمهان على الحفلات لعدة اسابيع، الشي لي كيخلي فراغ لفريقها ولجماهيرها نظراً لقيمتها الفنية الكبيرة وسط أرضية الميدان.

أسمهان مولات الضحكة لي دوزات سنوات مع عبد العزيز أحوزار، واللي معروفة بالشطيح الاستعراضي العفوي ديالها، كانت قررات تبدل ساعة بأخرى وتلتحق بالڭروب ديال الغريم الفني ديالو ، مصطفى أومكيل قبل ماتعرض لإصابة صعبة ،الشي لي كيتعتبر ضربة قوية للفنان خصوصا وأن الميركاتو قريب يتسد وبالتالي ميقدرش يلقا لي يعوضها.

الشيخات الزميلات ديالها فالضومين عبرو على التضامن وعلمو ݣود فالتصال هاتفي بأن حقها من الغرامة غادي يوصلها، كيف ما أن زيارة تضامنية غادي يدروهاليها باش يواسيوها قبل ما ترجع الميادين بعدما تخضع للعلاج والترويض.

الشيخة القيدومة فاطمة لاصيان قالت لگود ان قلة الحركات التسخينية مع كترة ليدام ديال المناسبات وقوة السهرات ديال الصيف، كيخلي الشيخات يتعرضو لإصابات، داكشي علاش الشيخة خاصها تكون رادة البال وتشطح بالنقطة والفاصيلة وتخرج العشور من فلوس الغرامة باش تحيد العين كتقول الشيخة لاصيان .