گود- كازا//

تواصل غرفة الجنايات بمحكمة الاستئناف بالدار البيضاء، الاستماع إلى الشهود فـ قضية ما يعرف بـ”إسكوبار الصحرا، المتابع فيها سعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة، وعبد النبي بعيوي الرئيس السابق لجهة الشرق والقيادي السابق فـ البام، وآخرون.

وف الجلسة ديال اليوم الخميس تم الاستماع لشهادة شيفور الحاج أحمد بنبراهيم الملق بـ”المالي” او “اسكوبار الصحرا”، قبل ما تقرر المحكمة تأخير الجلسة وتمسكها بإحضار باقي الشهود من بينهم الخدامة ديال لطيفة رأفت.

الشاهد نكر واش كان عارف أن أحمد بن براهيم أو “المالي” كان كايدير شي أنشطة خارجة على القانون، وهاذ الشي واخا قال إنه سلم مبالغ مالية كبيرة للخادمة ديال “المالي” واللي يقال أنها كانت كاتسلم لفلوس لسعيد الناصيري، وقال بلي تسلم مبالغ قيمتها بين 220 و250 مليون سنتيم وبلا ما يتأكد كيفاش تم تسليم هاد لفلوس لسعيد الناصيري.

الشاهد اللي سبق له قال عند البوليس بلي باع جوج طوموبيلات لشي جوج كايعرفهم سعيد الناصيري وبعيوي وأن داكشي عندو علاقة بشراكة ما بيناتهم، قال بلي الباطرون ديالو بنبراهيم شرا برطمة فـ حي الفتح بالرباط من سعيد الناصيري ثمنها 152 مليون سنتيم.

المحكمة واجهت سعيد الناصيري مع الشاهد، ونفى الناصيري الشهادات ديالو، وأكد أنها مزورة، ونفس الشي بالنسبة لعبد النبي بعيوي اللي أكد أن الشاهد كايقول شي حاجة ماشي دقيقة بخصوص تواريخ دخول “المالي” إلى المغرب.