محمد سقراط-كود///
حسب الأستاذ محمد حبيدة صاحب كتاب المغرب النباتي، فراه تاريخ المغرب عامر بالمجاعات والجفاف كان حاجة طبيعية، الناس كانوا مولفين يعيشوا عام ديال الصابة وبعدها سبع سنوات عجاف، لذا فراه أعوام لي كتعرف تساقطات بحال هاد العام راه قليلة وماشي هو الجو الطبيعي المعتاد، هاعلاش من المفروض نستافدوا لأقصى مايمكن من هاد الشتا، ولكن للأسف أغلب الشتا لي كتطيح كتمشي للبحر، ونسبة قليلة منها لي كتدوز للسدود لي واخا المغرب منذ عهد الحسن التاني وهو كيبني السدود الصغرى والكبرى إلا أنه ولحد الآن لا يستفيد من مياه الأمطار بالشكل الكافي، دابا نيت راه گاع داك لما لي غرق الغرب والقصر الكبير غادي يمشي للبحر، بينما راه داك لما طاح في الجبال لفوق وداز على اكبر السدود، وتم الاستفادة غير من نسبة قليلة منو والباقي مشا للبحر، ومن غير هاد الشتا الكثيرة لي طاحت هاد العام راه حتى فاش كتكون قليلة بحال العام الفايت لا يتم جمع مايكفي والاستفادة لأقصى درجة من هاد الشتا.
إسرائيل من أكثر دول العالم إستفادة من الأمطار، لدرجة الشتا لي كتطيح على أسطح المدارس دايرين ليها نظام تجميع وتستعمل في تنظيف هاد المدارس نيت، كيحاولو ما أمكن أي قطرة طاحت عندهم يستغلوها بأفضل طريقة حيت عارفين راسهم جاو في منطقة مهددة بالجفاف ودايرة بالاعداء المؤقتين، حاليا الى شفتي صور لإسرائيل بالقمر الاصطناعي غادي تبان ليك هي الأكثر خضارا في المنطقة وكلها مزارع، من غير ديلطا النيل طبعا، وحتى في الليل هي الأكثر إضائة في المنطقة وداير بيها غير الظلام، هاعلاش خاص ندوزو للسرعة القسوة في العلاقات ديالنا مع إسرائيل لأنها الدولة الوحيدة في العالم لي قادرة تساعدنا وتشارك معانا تطورها من أجل السلام والإنسانية، وبلا ماتحشي لينا شي أيديولوجية او مد وهابي او شيعي من تحت الدف.
إسرائيل من أهم الدول لي متطورة في العالم وجزء من هاد النهضة والتطور والتقدم لي وصلات ليه شاركوا فيه يهود مغاربة كيبغيو بلادهم المغرب ويحبوها، وباغين يطوروها ويشوفوها احسن بلاد في العولام، علاش لحد الآن باقي مكنستافدوش من هاد العلاقة وتكون واضحة وصريحة، إسرائيل دايرة أنظمة متطورة حتى كيفاش توصل لما للفرشة المائية وهي من احسن الدول في السقي بالتقطير وفي الفلاحة عموما علما ان مناخها مقودة عليه بحال كاع المنطقة راه جنب الصحرا، راه العلم والتقنية هوما السبيل الوحيد للتغلب على التطرف المناخي لي كيعاني منو المغرب حاليا، من غير المنطقي تبقى البلاد معولة على طرق بدائية في تجميع المياة وطرق بدائية مشابهة في الفلاحة، وهادشي كامل عند إسرائيل.
