وكالات//

فـ قضية صدمات ألمانيا، الشرطة الإسرائيلية قررات تفتح تحقيق فـ اختطاف جوج دراري صغار ألمان، اللي كيتقال أن عصابة من “الموساد” هي اللي خطفتهم، وبأوامر يمكن تكون جاية من الأم ديالهم، سيدة الأعمال كريستينا بلوك.

الأب ديال الوليدات، ستيفان هانسيل، غادي يسافر قريبا لإسرائيل باش يقدّم شكاية رسمية ضد المنظمة اللي خطفات ولادو.

الشرطة الإسرائيلية غادي تبدا تحقق فالمعطيات اللي توصلات ليها السلطات الألمانية، واللي كتشير أن يعقوب بيري، الرئيس السابق لجهاز “الموساد”، كان عندو يد فـ تكوين الفريق اللي دار عملية الاختطاف.

واحد من المتهمين الإسرائيليين دابا كيتحاكم فهامبورغ، ولكن ستة آخرين هربو لإسرائيل، وما يقدروش يسافرو حيث كاينة مذكرة توقيف دولية فحقهم.

محاكمة كريستينا بلوك، السيدة الغنية ووريثة سلسلة مطاعم “بلوك هاوس”، خذات اهتمام كبير فـ الصحافة الألمانية، من بعد ما اتهموها بأنها هي اللي كلفات عملاء ديال الموساد باش يخطفو ولادها من عند الأب، فوسط نزاع على الحضانة كان داير بيناتهم، وكانو الوليدات فداك الوقت فالدنمارك.