كود -وكالات //

تزعزعات بزاف من المدون فـإسرائيل مع الفجر ديال نهار الثلاثاء بعد ما إيران طلّقات عدد من الصواريخ نيشان للشمال والوسط ديال البلاد،.

فـتل أبيب، خدمات الإسعاف ديال نجمة داود الحمراء قالت أن ستة ديال الناس تجرحو وشلا عمارات طوموبيلات فوسط المدينة تقاسو ،كما قالت القناة 12 العبرية أن واحد من الصواريخ لي كان فيه راس حربي مشظي تفرقات منّو ما بين ثلاثة حتى لربعة القنابل، كل وحدة فيها 100 كيلوغرام، وهاد الشي خلا أضرار كبيرة.

وفجنوب إسرائيل، طاح صاروخ إيراني كيتقدّر الوزن ديالو ب 450 كيلوغرام فمدينة عراد، وطيح معه 2 ديور و 6 ضررو فحي تابع للطائفة الحريدية.، فرق الإسعاف قالت إنها هزات 75 واحد من بلاصة الانفجار، من بينهم 23 شخص حالتهم خطيرة حتى ل متوسطة،  اما فرق الإنقاذ كيقلبو على ناس ممكن يكونو واحلين تحت الردم .

وفالمقابل، وكالة “فارس” الإيرانية قالت إن هجمات لبارح بليل  ضربات جوج منشآت للطاقة فمدينتي أصفهان وخرمشهر، وتسببات فخسائر وأضرار فبعض أجزاء المنشآت وديور قريبة منها، بلا ما يتسجلو إصابات ، كما حذّر نائب وزير الخارجية الإيراني من أن استهداف منشآت الطاقة والبنية التحتية الحيوية كيشكل خرق واضح للقانون الدولي، وأكد  أن المسؤولين على هاد الهجمات يقدرو يواجهو اتهامات بارتكاب جرائم حرب.