محمد سقراط-كود///

في فيلم anything else لوودي آلن كاين واحد المشهد بين بطلي الفيلم، الأول أستاذ جامعي شيباني يهودي والتاني مؤلف شاب، الشيباني عطى نصيحة مهمة للشاب قاليه خاص ديما تكون عندك عدة النجاة وتكون ديما قادر تمد يدك لأي بلاصة وتجبد سلاح، سولو الشاب وعلاش هادشي، كان الجواب” واش كتظن أن العالم شبع من دم اليهود” هاد النظرية ديال وودي آلن ماجاياش من والو بل نتيجة واقعية للعديد من الابادات الجماعية لي تعرضوا ليها اليهود عبر التاريخ.

تاريخ اليهود مرتبط بمحاولة العديد من العرقيات الأخرى إبادتهم، فين مايستقروا فشي منطقة ويولفوا ويوليو ينتاميو ليها كتنوض شي حملة إبادة جماعية ضدهم، قبل الهولوكوست كانت روسيا القيصرية دارت إبادة جماعية لليهود في مناطقها والدول الخاصعة لنفوذها اظطرو يهربوا من بعد لدول أخرى، مكاملاش ربعين عام بدا هتلر إبادة جماعية ليهم، وقبل منها العديد من محاولة القتل الجماعي لعرق مرتبط بديانة هي أصل الديانات وهاد الصداع كامل، هنا فين قرروا جماعة بلي هادشي ماباقيش غادي يتعاود وغادي يأسيوا دولة قوية ويتجمعوا فيها ويحميو راسهم ويحميهم الغرب طبعا، ولكن الدولة داروها في أراضي وحدين خرين وتبنات على التهجير والحروب وبقا الكره والحقد والبغضاء متجدرة بين الدولة الجديدة ومحيطها كامل.

حتى لهاد السيمانة وشفنا فيديوات لإستمرار النهج باش كانوا كيتعاملوا اليهود تاريخيا، هجوم ديال متشددي حماس على المستوطنين اليهود لي كانوا في منطقة نزاع وزعمة موجدين لهادشي ولكن باغثوهم وشفنا من جديد صورة حية لما كان يقع لليهود عبر التاريخ ولداكشي لي داروه هوما نيت للفلسطنيين، البعض منو موثق والأخر داز ايامات الغفلة بقا فيه غير التعاويد ديال الضحايا في حالة بقاو خيين أصلا، إسرائيل دولة صديقة وفلسطين قضية تم تلقيننا إياها منذ الصغر وبينهما تاه المغاربة شي كيقول كلنا إسرائيل وشي كلنا المقاومة.