كود – وكالات//

إسرائيل وقفات جميع صفقات السلاح والتجهيزات الدفاعية مع قطر، فقرار  كيشمل حتى العقود القديمة اللي توقعات قبل 4 ولا 5 سنين ، حسب ما نقلاتو القناة الإسرائيلية 12 .

وحسب التقرير، القرار كيشمل حتى تصدير منتجات الصناعات الدفاعية الإسرائيلية لقطر، وماشي غير الصفقات الجديدة، ولكن حتى العقود اللي سبق توقعات ومازال التنفيذ ديالها فالطريق.

وكتشير تقارير إعلامية أجنبية بلي الصناعات الدفاعية الإسرائيلية سبق ليها باعت لقطر أنظمة ديال السلاح والدفاع، و أنظمة سيبرانية ووسائل للدفاع الجوي، فصفقات وصلات قيمتها لمئات الملايين ديال الدولارات.

هاد الصفقات كانت فالسابق واخدة الموافقة ديال وزارة الأمن الإسرائيلية ورئيس الحكومة، ولكن القرار الجديد كيبان أنه كيعكس تبدل كبير فطريقة تعامل إسرائيل مع قطر، وسط مؤشرات على أن الإجراءات ضد الدوحة ممكن تتوسع أكثر.

المؤسسة الأمنية الإسرائيلية كتشوف قطر كدولة كتتخذ مواقف معادية لإسرائيل، خصوصاً مع الصداع السياسي والأمني بين الطرفين.

هاد القرار كيجي فمرحلة كتعاود فيها إسرائيل تقييم العلاقات ديالها مع قطر، اللي لعبات  فالسنوات الأخيرة دور مهم فالوساطة بين إسرائيل وحماس، وكانت كتستقبل قيادات الحركة فالدوحة.