عمر المزين كود ـ لإسرائيل ///
التقت “كود” بعدد من الإسرائيليين اللي هوما من أصول مغربية في معرض منتوجات الصناعة التقليدية بمدينة الخضيرة الإسرائيلية للي كتنظمو غرفة الصناعة التقليدية لجهة فاس مكناس بتعاون مع جماعة خضيرة.
المعرض عرف منذ الافتتاح ديالو إقبال كبير على مختلف المنتوجات ديال الصناعة التقليدية اللي جات من المغرب لإسرائيل، وتحديدا من مدينة فاس وعدد من المناطق المجاورة ليهم.
إسرائيليات جدودهم مدفونين فالمغرب فرحانين بزاف ببلادهم الثاني، كاين فيهم لي من كازا وكاين لي من بني ملال وكاين لي من وزان وكاين لي من فاس، والفرحة مقاداهم بهاد المعرض المغربي.
وكما عاينت “كود”، فإن هاد الإسرائيليات والإسرائيليين شراو منتوجات ديال الصناعة التقليدية بحال الفضيات، والعطور التقليدية، وحمقاتهم الخياطة التقليدية، بالإضافة إلى الملابس الجلدية، والزليج التقليدي ديال فاس، النجارة والزرابي وحتى الخرازة .
