گود سبور//

توج منتخب إسبانيا بكاس العالم 2026، للمرة الثانية فالتاريخ ديالو، بعدما ربح منتخب الأرجنتين فالفينال اليوم الاحد فتيران ميتلايف فنيوجيرسي نيويورك فالميريكان، بعد ماتش ماراثوني بين المنتخبين، خطفت فيه المواجهة بين الإسباني من أصل مغربي لامين يامال والأرجنتيني ليونيل ميسي الأنظار، خصوصا وانهم بجوج ولاد البارصا وعندهم هاديك التصويرة الشهيرة فاش كان يامال تربيا وميسي مازال صغير وبادي الكاريير ديالو، مع العلم أن يامال كان اكثر نشاطا فالفينال أما ميسي راه ما بانش.

وسالا الوقت الأصلي من الماتش بين إسبانيا والأرجنتين بنتيجة التعادل السلبي زيرو لزيرو، وكانت السيطرة فالماتش ديال إسبانيا بالطول والعرض، وخلقو بزاف ديال الفرص ولكن الگول ديال الأرجنتين مارتينيز وصحابو المدافعين بقاو صامدين كايدافعو على بوطوهم حتى سالا الماتش أمام هجمات لامين يامال وصحابو، ومع نهاية الـ90 دقيقة خدا فيرنانديز لاعب الأرجنتين حمرا وبقاو صحابو لاعبين غير بـ10.

ومشى الماتش للشوطين الإضافيين وحتى حاجة ما تبدلات بقات السيطرة إسبانية والخطورة للامين يامال وصحابو، ومع بداية الشوط الاضافي الثاني يخطفو الاسبان هدف الرباح بواسطة فيران توريس فالدقيقة 106، بعد اسيست بالراس ديالو صاحبو نيكو ويليامز اللي كفح الگول الأرجنتين مارتينيز وصحابو المدافعين، وعطى الكورة لتوريس اللي ضربها للشبكة، وبقاو الصبليون محافظين على النتيجة حتى سالا الشوط الاضافي الثاني، وكانت الأرجنتين تقدر ترجع فالنتيجة فالوقت اللي حيد الحكم هدف ثاني للصبليون بداعي التسلل، مع الإشارة إلى ان القرارات التحكيمية د الحكم كان فيها جدل كبير، حيث الصبليون ماركاو هدف فالشوط الاضافي الاول وحيدو بداعي خطأ على المهاجم الاسباني على المدافع الأرجنتيني، وهذا قرار فيه نقاش.

وبهذه النتيجة توج منتخب اسبانيا بكاس العالم 2026، وهذا ثاني لقب ديال لاروخا بعد اللقب الاول فمونديال 2010 فجنوب افريقيا، أما الأرجنتين حامل اللقب فمونديال 2022، واللي عندهم 3 ألقاب فكاس العالم، ما قدروش يحافظو على اللقب ديالهم فمونديال 2026 وقنعو غير بالوصافة هما والكابيتان ديالهم ليونيل ميسي اللي هذا آخر مونديال له.