كود – سبتة //

وخا الغيار لي نايض بين الرباط ومدريد بسباب أزمة سبتة، سلّمات الشركة الإسبانية العمومية «Navantia» للمغرب، نهار الخميس 17 شتنبر، السفينة العسكرية «مولاي الحسن الأول»، فحوض بناء السفن ديال سان فرناندو حدا قادس، ولكن بلا حفل رسمي اللي كان متوقع يتنظم فهاد النوع ديال عمليات التسليم.

عملية التسليم دازت بشكل تقني ومحدود،  بتوقيع محضر التسليم بين «Navantia» والبحرية الملكية المغربية، وهاد الخطوة كتسمح دابا للسفينة تخرج من الحوض الإسباني وتمشي للمغرب.

وسائل الإعلام الإسبانية لي نشرات الخبر ربطات غياب المراسم بالصداع اللي عرفاتو العلاقات بين البلدين من بعد أزمة سبتة، ولكن مصادر مرتبطة بالشركة المصنعة قالت بلي عدم تنظيم حفل كان داخل أصلاً فترتيبات الاتفاق، وبالتالي ما كاينش تأكيد رسمي بأن الأزمة هي السبب المباشر.

سفينة «مولاي الحسن الأول» مبنية على منصة Avante 1800،ر واصلة ل 87 متر فالطول و13 متر فالعرض، وكتوزن  2020 طن، وقادرة تستقبل ايكيب من  60 واحد.

قيمة المشروع وصلات ل130 مليون أورو، مع الدعم التقني واللوجستي، والبياس، والمعدات والتكوين ديال الطواقم المغربية.

بناء السفينة بدا فـ2023، ومن بعد تدارت تطلقات فـ27 ماي 2025، قبل ما تدخل مراحل التجارب البحرية.

المشروع خلق كثر من مليون ساعة ديال الخدمة و 1100 منصب مباشر وغير مباشر ، حسب المعطيات المنشورة حول البرنامج.

وهاد التسليم عندو حتى دلالة خاصة فالتعاون العسكري البحري بين المغرب وإسبانيا، حيث كتعتبر «مولاي الحسن الأول» أول سفينة حربية كيبنيها حوض إسباني للمغرب من  1983.

السفينة مخصصة أساساً لمهام المراقبة البحرية، الحضور فالبحر، مراقبة المجال البحري والتدخل، وكتقدر تبقى فالبحر وقيتة طويلة .