كود كازا//

أكد إدريس لشكر، الكاتب الأول لحزب الاتحاد الاشتراكي للقوات الشعبية، فتصريح خلال الجلسة الافتتاحية ديال المؤتمر الوطني التاسع للنقابة الوطنية للصحة العمومية، امس الجمعة بالرباط ، أن الإحاطة اللي دارها المبعوث الأممي ستافان دي ميستورا على ملف الصحراء المغربية قدّام مجلس الأمن، خاصنا ناخدوها كفرصة باش نفكرو بواحد الطريقة مسؤولة وهادئة فالمستقبل ديال قضيتنا الوطنية.

لشكر قال: “خاصنا نفتاخرو بالمجهودات الكبيرة اللي دارها المغرب فهاد الملف، ولي خلات الرأي العام الدولي اليوم يكون منخرط معانا وواقف مع القضية الوطنية ديالنا”.
ولكن، فوسط هاد التقدم، بقاو كاينين عراقيل، ومن بينهم – حسب لشكر – بقايا المؤامرات فالاتحاد الإفريقي، حيث ما زال كاين الاعتراف بجمهورية وهمية، رغم أن بزاف ديال الدول الإفريقية سحبات اعترافها بها.

وأضاف: “سنة 2025 خاصها تكون سنة الحسم، بحال ما قال الملك محمد السادس، او خاصنا نخدمو باش نطردو هاد الجمهورية الوهمية من الاتحاد الإفريقي”.

وبالنسبة للإحاطة اللي دارها دي ميستورا، لشكر شاف فيها تقدم، خصوصا فاعتبار الحكم الذاتي حل جدي ومعقول، ولكن شدد أنه خاص قرار صريح من مجلس الأمن يقول بوضوح أن الحل الوحيد هو تحت السيادة المغربية، وبالحكم الذاتي.

وفنفس السياق، أعلن لشكر أنه غادي يقترح على المكتب السياسي للحزب ينظم ندوة وطنية فمدينة العيون، ويجمعو فيها الصحراويين اللي كايآمنو بالحكم الذاتي تحت السيادة المغربية، باش يتفتح النقاش فهاد الملف وسط الناس اللي عايشين فالأقاليم الجنوبية.

وقال: “الناس اللي كايعيشو فالصحراء هم أول ناس معنيين بالحكم الذاتي، وماشي البوليساريو، راه كاين صحراويين فداخل المغرب وفي الخارج اللي ما كيمثلوهمش البوليساريو، ومقتانعين بمغربية الصحراء”.

وختم إدريس لشكر كلامو بالتأكيد على ضرورة رفع السقف والطموح، والانتقال من التدبير التقليدي للتغيير الحقيقي، وقال: “خصنا نخرجو القضية الوطنية من اللجنة الرابعة، وخص مجلس الأمن يخرج بقرار واضح وصريح، ماشي يبقى فعبارات عامة بحال اللي جات فإحاطة دي ميستورا. الحل هو السيادة المغربية والحكم الذاتي لجميع الأقاليم الصحراوية”