كود ـ مراكش//

المحكمة الإدارية الابتدائية بمراكش غادي تنظر، اليوم الثلاثاء 9 دجنبر 2025، فطلب عزل رئيس جماعة أمزميز، ونائبو، بجوجهم من حزب التجمع الوطني للأحرار، على خلفية اختلالات فالتدبير والتسيير ديال الشأن الجماعي.

هاد الملف جا بناء على تقرير دارتو المفتشية العامة للإدارة الترابية، اللي وقفات فيه على خروقات واختلالات فطريقة تدبير الجماعة، واعتمادا على المادة 64 من القانون التنظيمي رقم 113.14، اللي كتنظم مسطرة العزل فحالات الإخلال الخطير بقواعد الحكامة المحلية.

وكان عامل إقليم الحوز قرر من قبل يوقف رئيس الجماعة ونائبو بصفة رسمية، قبل ما يتقدم بطلب للمحكمة الإدارية باش تبتّ فمسألة العزل ديالهم، فخطوة اعتبراتها الجهات الرسمية ضرورية باش يتفرض احترام القانون وتتكرّس مبادئ الحكامة فالتسيير المحلي.

ساكنة أمزميز كا تنتظر نتائج هاد الدعوى وكيتسناو شنو غادي تقرر المحكمة الإدارية فهاد القضية اللي شغلات الرأي العام المحلي.