كود ـ مراكش//

قررات المحكمة الإدارية الابتدائية بمراكش، أمس الثلاثاء 23 دجنبر 2025، عزل علال الباشا، رئيس مجلس جماعة أمزميز بإقليم الحوز المنتمي لحزب التجمع الوطني للأحرار، من الرئاسة وحتى من العضوية ديال المجلس، مع شمول الحكم بالتنفيذ المعجل وتحميلو الصائر.

وحسب المعطيات اللي توصلات بها “كود”، فالمحكمة كذلك قررات تحجز ملف نائب الرئيس للمداولة، وحددات جلسة 30 دجنبر الجاري للنطق بالحكم فالقضية ديالو.

هاد القرار جا بناء على ملف دارتو المفتشية العامة للإدارة الترابية، واللي كيهضر على مجموعة ديال الاختلالات فطريقة تدبير الشأن الجماعي بأمزميز، واعتمدات فيه المحكمة على مقتضيات المادة 64 من القانون التنظيمي رقم 113.14، اللي كتنظم مسطرة العزل فحالات الإخلال الخطير بقواعد الحكامة المحلية.

وكان عامل إقليم الحوز، مصطفى المعزة، سبق ليه قرر توقيف الرئيس ونائبو بشكل رسمي، قبل ما يتقدم بطلب قدام المحكمة الإدارية من أجل عزلهم، فخطوة قالت عليها الجهات الرسمية بأنها ضرورية باش يتطبق القانون ويتحترمو مبادئ الحكامة الجيدة فتدبير شؤون الجماعة.