كود سبور//

يواصل اللاعبين المغاربة حصد اعترافات المؤسسات الكروية الدولية، عكس الاتحاد الافريقي لكرة القدم، اللي ولات اختيارات منح الجوائز ديالو فيها شكوك وجدل كبير، وهذه المرة أكد الاتحاد الدولي للتاريخ للإحصاء، أن المغربيين سفيان رحيمي وأيوب الكعبي هما أحسن 2 هدافين فالعالم لعام 2024.

ومنح الاتحاد الدولي للتاريخ والإحصاء، جائزة أحسن هداف دولي فالعالم لعام 2024، للمهاجم المغربي سفيان رحيمي نجم العين الإماراتي برصيد أهداف وصل لـ20 هدف، وجا وراه المغربي الآخر أيوب الكعبي نجم أولمبياكوس اليوناني فالمركز الثاني برصيد 19 هدف.

وتفوق الثنائي المغربي على مهاجمين معروف عالميا بحال النرويجي إيرلينگ هالاند مهاجم مانشستر سيتي النگليزي، اللي جا فالمركز الثالث، والنگليزي هاري كين مهاجم بايرن ميونخ الألماني اللي جا سادس، والأسطورة البرتغالي كريستيانو رونالدو مهاجم النصر السعودي اللي ثامن، أما النيجيري اللي أديمولا لوكمان مهاجم أتلانتا الإيطالي اللي عطاوه الكاف جائزة الكورة الذهبية الأفريقية لعام 2024، جا هو التاسع.

للإشارة فالاتحاد الأفريقي لكرة القدم، خرج الدوليين المغربيين سفيان رحيمي وأيوب الكعبي بكري من المنافسة على جائزة الكورة الذهبية لعام 2024، واخا حققو إنجازات تاريخيّة، بحال رحيمي مثلا اللي ربح دوري أبطال آسيا مع العين وكان هو الهداف ديالهم وربح برونزية أولمبياد باريس وكان هو هداف الدورة، أما أيوب الكعبي راه منح لقب الكونفرونس ليگ لأولمبياكوس اليوناني.