أحد الطيب – كود الرباط///

تأكيدا للخبار اللي كانت “كود” السباقة لنشره، أحيل صباح اليوم الخميس (12 يونيو 2025) أحد قضاة النيابة العامة العامل بفاس على أنظار محكمة الوكيل العام للملك لدى محكمة الاستئناف فالعاصمة الرباط، وذلك في إطار قواعد الاختصاص الاستثنائية.

وكشفت مصادر مطلعة، لـ”كود”، أن المسؤول القضائي غادي يتم البحث معاه على شي قضية يجري البحث مع أشخاص بخصوصها لهم علاقة بشي حد مشدود حاليا فالحبس خارج البلاد وكان يستهدف مسؤولين قضائيين وأمنيين وحتى إعلاميين بأخبار كولها كذوب بهدف التأثير عليهم وعلى عائلتهم.

وحسب ما جاء في المادة 266 من قانون المسطرة الجنائية، فإنه كان الفعل منسوبا لشي قاضٍ بمحكمة استئناف، فإن للوكيل العام للملك لدى محكمة النقض أن يحيل القضية بملتمس إلى الغرفة الجنائية بالمحكمة المذكورة التي تقرر ما إذا كان الأمر يقاضي إجراء تحقيق.

هاد المادة نفسها جا فيها أن الرئيس الأول لمحكمة الاستئناف المعنية ينتدب لهاد الغرض قاضيا للتحقيق أو مستشارا بمحكمته لإجراء البحث فهاد الوقائع موضوع المتابعة.

ومني يسالي البحث فهاد الملف، حسب المادة المذكورة، خاص قاضي التحقيق أو المستشار المكلف بالتحقيق يرفع الملف للوكيل العام للملك لدى محكمة الاستئناف باش يقدم الملتمسات ديالو النهائية.

دبا هاد الملف تحرّك ومزال ملفات أخرى جبدهم الوكيل العام للملك لدى محكمة النقض رئيس النيابة العامة، واللي بدا مهامو بحملات التطهير الواسعة، والنتائج ديالها بدات كتبان في وقت وجيز بعد تعيينه فهاد المنصب من طرف سيدنا.

نساينو دبا حريرة هاد نائب الوكيل العام دفاس اللي يشبه أن عندو أمور أخرى أكبر من قضية داك النصاب اللي مشدود في إحدى سجون إيطاليا، وكان وراء تفجيرها “م” شي حد عندو بيه علاقة. نساينو دبا قرار قاضي التحقيق اللي غادي يعينو ليه الرئيس الأول صباح اليوم، ونرجعو للموضوع.