كود – أكادير //

كاينة واحد الفوضى والروينة فجامعة ابن زهر وبالضبط كلية العلوم القانونية والاقتصادية مع بداية العام الدراسي الجديد واقتراب موعد الامتحانات، حيث عدد كبير من الطلبة تسجلو وتلغى التسجيل ديالهوم.

وحسب مصادر كود فسبب هاد الفوضى هو الميزاجور لي تدارت لـ سيت ديال الكلية حيث تدارت هاد العام إعادة التسجيل لموسم 2022/2023 فالموقع الإلكتروني عبر التسجيل في برنامج التغطية الصحية للطلبة ولكن مع الميزاجور ديال الموقع كلشي ترون.

وفي تصريح لكود اكد عدد من الطلبة انهم تفاجؤو بعدم تسجيلهم رغم انهم قامو بذلك عبر الموقع الالكتروني ومبقاوش عارفين شنو غايديرو.

إدارة كلية القانون حاولات تدارك المشكل وفتحات باب إعادة التسجيل قبل أيام من انطلاق الامتحانات ديال الدورة الخريفية بشرط التوفر على بطاقة الطالب أو وصل التسجيل ولكن المشكل أنه كاين لي معندوش.

بالتزامن مع هادشي، لوحظ غياب الموظفين فالإدارة ديال كلية القانون بحي الداخلة- أكادير فوقت العمل ويقدر يكونو  ماتشات كأس العالم هي السبب.