محمد سقراط-كود///
كنظن أن النص ديال المغاربة لي على قد الحال الى عرضتي عليهم صفقة ديال يتحولوا لميليارديرات ويديرو الممتلكات وولادهم يقراو في احسن المدارس ويحسنوا من وضعهم التجتماعي ويتسلقوا لأعلى الهرم الطبقي مقابل سنوات من السجن في آخر حياتهم غادي يوافقوا بدون تردد، وراه هادي هي الصفقة لي دارو العديد من المفسدين، قمرو غامرو دارو الملايير والممتلكات والقهاوي والفنادق والأراضي والشركات، وضمنوا مستقبل ولادهم وحفايذهم وصولا للجيل الرابع، وفي اللخر فاش كيتفرش كتسمع شي احكام متساهلة جدا والمحاميين كيطالبوا بظروف التخفيف نظرا للحالة الصحية، فاش كان كيشفر كان صحيح حتى تشد عاد مرض.
أي مسؤول او سياسي تشد بالفساد خاص يتصادرو جميع ممتلكاتو وممتلكات المقربين منه، بنت برلماني فاسد يالله كملات عشرين عام وكتلقى عندها ممتلكات أي كانوا عند الاقطاعيين في القرون الوسطى وهي نهار تزادت كان باها غير موظف عادي جدا او مستخدم فشي بلاصة، فاش كيتشد الاب كتبقى هي محافظة على نفس مستوى العيش والممتلكات ، وصافي حياتها تقادات على ظهر وحدين خرين لي تسلب منهم هادشي، واحد بحال الفايق مثلا مخلي ولاد وبنات منطقة ولاد الطيب بلا ثانوية كيسافرو كل نهار باش يقراو وهوما غير جنب المدينة ماشي فشي منطقة نائية، وفي الاخر راه المقربين منو عايشين بفلوس داك الفساد لي تسبب في الهدر المدرسي للعديد من الأطفال وهادشي غير مثال.
فساد المسؤولين راه فيروس كينخر جسد هاد البلاد، هاديك الفلوس لي كينهبو راه كانت موجهة لخدمات غادي يستافد منها المواطن وتحسن الحياة ديالو، وغادي تستافد منعا البلاد على شكل مشاريع ديال البنية التحتية وتجهيزات غادي يفيدو كولشي، وبسباب الفساد كيتأخر هادشي عشرات السنين وكيتهلقوا مشاكل كتقام على الدولة بالملايير باش تحلها وكتبقى تعاتي منها البلاد لعشرات السنين، فاش قايد ووقدم ومرشح كيسمحوا بظهور كاريان راهم كيتسببوا فموشكيل بنبوي اجتماعي كتعاني منو البلاد والعباد لمدة طويلة وفي اللخر مكنسمعو بحتى شي عقوبة حقيقية للفاسدين لردعهم، هاد العقوبات الحالية وظروف التخفيف والتسهيلات لي كيستافدو منها المتابعين في تهم الفساد راه كتشجع على هاد السلوك عند المغاربة كاملين ولي ماشي فاسد كيبدى يحس براسو مشموت في هاد الحياة.
