گود سبور- نيوجيرسي//

نايضة ففرنسا على مدرب المنتخب الفرنسي ديدي ديشامب، والسبب هو النجم الشاب للمنتخب الوطني المغربي ايوب بوعدي.

مستوى أيوب بوعدي الكبير مع المنتخب الوطني المغربي ضد منتخب البرازيل البارح السبت فنيوجيوسي فميريكان فأول ماتش للأسود فكاس العالم 2026، وهو أول ماتش رسمي له مع ليكيب ناسيونال، نوض النحل على الناخب الفرنسي ديشامب، والجماهير الفرنسية كاتشوف إن الكورة الفرنسية خسرت موهبة كبيرة ولاعب غايكون نجم كبير فالمستقبل.

الفرنسيين على مواقع التواصل الاجتماعي والإعلامي الفرنسي ساخطين وما ممسروطش لهم أن منتخب بلادهم زگل موهبة أيوب بوعدي، ومبردين السم ديال غضبهم فالمدرب ديدي ديشامب حيث هو زعما اللي ما عرفش يتعامل مع أيوب بوعدي باش يقنعو يلعب مع منتخب الفرارج.

ولكن فالحقيقة راه الجامعة الملكية الملكية المغربية لكرة القدم برئاسة فوزي لقجع، خدمت مزيان على هذا الملف، وحتى المدربين وليد الركراكي ودابا محمد وهبي، إضافة إلى ان اللاعب كانت عندو نية يلعب مع المنتخب المغربي بلاد والديه بجوج وهاذ الشي سهل على أنه يلبس توني د السبوعا، وخلى الفرنسيين عاگزين يديرو شي حاجة.