محمد سقراط-كود///

فاش كتقرب لمراكش كتبدى تشوف السياح الأجانب في كل بلاصة، ابتداء من واحة سيدي براهيم غادي تشوفهم كيتساراو زرافات زرافات فوق الجمال او بالكواد، وتلقاهم حتى في السويقة ديال بلعگيد، والمدينة راه غادي تشوفهم في كل بلاصة بل وكاينين حتى في اطراف المدينة وفي الأسواق الأسبوعية المحيطة والفيلاجات المحيطة بيها، كذلك الصويرة مثلا غادي يبانوا ليك السياح في الغزوة والذيابات والكورنيش وفي شواطئ المحيطة بالمدينة بحال سيدي كاوكي، وكذلك اكادير ابتداء من امسوان ونتا غادي وكتشوف في السياح على جنبات الطريق وفي الأسواق والمقاهي وكتشوف أن المنطقة مروجة معاهم، ومدورين الحركة لدرجة وليتي تلقى حانوت عادي في ايمسوان مثلا عندو أي حاجة بغيتيها بحال الى راك في مدينة كبيرة .

إلا في مدينة فاس ماغاديش تشوف السياح حتى تهبط للمدينة ومع ذلك ماغاديش تلقاهم غاديين مساريين وطالقينها تسرح بحال في مراكش، بل غادي جماعات مع گيد مطوفهم بحال الى كيدير شي شعائر دينية كيدوزهم من الزناقي طايرين بالجرى، باش يخشيهم فشي رياض او بازار وصافي هادي هي السياحة في فاس، واخا كتقرى على ارتفاع عدد ليالي المبيت في المدينة، ولكن فاش كتهبط للمدينة تشوف هاد أثر السياحة على الحوانت والصنايعية والقهاوي والمطاعم غادي تلقى اغلب الزبناء مغاربة او سياحة داخلية، أين يختفي السياح في مدينة فاس؟ هاد السؤال طرحتو على عدة صنايعية وأصحاب المحلات في المدينة، وكان جوابهم واحد، هو كاين فاعلين كبار في قطاع السياحة محتاكرين السوق، كيجي السائح كيتعرضو ليه في المطار كيركب معاهم في النقل ديال نفس الشخص كيتغداو في مطعم ويتقداو من بازار ويباتو في فندق او رياض ديال نفس الشركة او متعاونين معاها، ويمشيو بحالاتهم، المدينة مكتستافد منهم والو، سائح معلب مصمط مگمط حتى الزناقي منين كيدوز في المدينة القديمة مرسومين من قبل ومحددين، وباش يستافد هاد الصنايعي البسيط من هاد السائح خاصو يخلي المرشد يجعب السائح الى بغا ياخد شي حاجة ويقسم مع مول المحال، أو غادي يجرو عند واحد آخر كيقبل بهاد المعاملة.

فاس بالنسبة ليا خاصها تكون كتنافس مراكش راس براس، ولكن للأسف راها بعيدة وبزاف، واخا راه أي حاجة كاينة في مراكش غادي تلقى منها جوج وتلاتة في فاس ابتداء من المدارس العتيقة، ومع ذلك مامستغلاهمش المدينة، يمكن تدور دابا في المدينة الجديدة كلها يالله تقدر تشوف سائح او جوج خارجين من كارفور والكار كيتسناهم برة، علما ان فاس راه على الأقل هلص تكون مدينة للإنطلاق نحو الجنوب الشرقي بالنسبة للكارافانات وصحاب الماطر والكاطكاطات، ولكن راه مكاينش منتوج كيتوجه ليهم او كيخلي هاد المدينة وجهة سياحية لعدة أنواع واشكال ديال السياحة، كاين فقط سياحة الكار ديال السياح جاي من المطار  للبازار للمطعم للفندق ماشاف ماتشاف.