كود – عثمان الشرقي//

توفّات اليوم بريجيت باردو، واحد من أكبر الأسماء فتاريخ السينما الفرنسية، وفعمرها 91 عام، حسب ما علنات عليه المؤسسة اللي كتحمل سميتها، بريجيت كانت رمز ديال جيل كامل، ووجه عالمي كيعكس الجاذبية والحرية فالخمسينات والستينات، باردو فرضات حضورها بقوة فالسينما بالجرأة ديالها وتحررها وتهراس الطابويات فداك الوقت.

وأشارت المؤسسة إلى أن الممثلة ماتت اليوم الأحد في مقر الإقامة ديالها في لا مادراغ ف سان تروبيه بجنوب فرنسا.

وقليل في كانت باردو كتبان في الأماكن العامة ف الأشهر الأخيرة، لكنها نُقلت إلى المستشفى في أكتوبر، وفي الشهر التالي أصدرت بيانا تنفي فيه شائعات وفاتها.

المسار الفني ديالها كان استثنائي، من أفلام ولات كلاسيكيات بحال:

Et Dieu… créa la femme (And God Created Woman) – 1956

Le Mépris (Contempt) – 1963

Viva Maria! – 1965

هاد الأعمال خلاو الممثلة الفرنسية الأكثر شهرة فالعالم فداك الزمان، وخا النجاح الكبير، باردو كانت كتعيش ضغط نفسي كبير بسبب الشهرة والضغط ديال الاعلام والصحافة والنجومية، الشي اللي خلاها تسمح فموهبتها وتبعد على عالم الفن.

فـ1975، خذات قرار مفاجئ وقطعات نهائياً مع السينما وهي مازالا فالقمة، واعتبراتو أحسن قرار دارتو فحياتها، من بعد تفرغات كلياً للدفاع على الحيوانات، وولات من أوائل الناس اللي دارو حملات قوية ضد الصيد، وتعذيب الحيوانات، واسسات مؤسسة خدامة مزيان فهاد المجال وبقات وفية لهاد القضية حتى لآخر عمرها.

بريجيت باردو بقات مشهورة حيث عاشت كي بغات، ولعبات أدوار جريئة، عاشت حياتها بطريقتها، وملي قنعات، سدات الباب وخرجات بلا دراما، هاد الشي هو اللي خلاها تبقى حاضرة فالذاكرة، فنانة دوزات حقها فالنجومية وخا هكاك مخلاتهاش تسيطر عليها.