محمد سقراط-كود///
واخا الموت طالعة هاد ليام والأرقام ديال الإصابات كثيرة وغير مسبوقة والنظام الصحي كلا لعصا، إلا أن المغاربة في الشارع كاع ممسوقين ويمكن نعتابروهم مرتاحين حيت مكاينش الإغلاق والحجر الصحي( أنا واحد منهم)، ليوم كنت فالسوق الأسبوعي عامر كثر من الأيام لي فاتت، مكاينش الرواج لكثير ولكن بعدا بنادم محرك الحركة ويجيب ماياكلو ولادو، الخضرة رخيصة والخير موجود، والناس كتقدى، لي زايد في السوق هاد الأيامكثر من الأيام العادية ما قبل كورونا هو عدد الناس لي كيبيعو حوايجهم والأثات ديالهم تزاد بزاف، كاين الرواج ولكنوسط داك الرواج كاين بؤس وقوادة وأزمة وكاين الناس تضررات في مصدر رزقها وعايشة غير باش ماكتب الله، خصوصا الصناعية ديال الصناعة التقليدية وأي حاجة عندها علاقة بالسياحة والعراسات تهرسو بزاف والناس باعت حوايجها باش تقدر تاكل وتشرب، خصوصا آخر السلسلة ديال الصنايعية مكان لا إذخار لا والو، بنادم غادي مع الوقت قد قد نهار جات كورونا لقى غير الضص مع أصلا كانو قراب ليه وهوما خدامين.
أيام الحجر الصحي واخا مكانتش الموت كثيرة والحالات كانو قلال مقارنة بدابا ولكن الناس كانت الخلعة باينة فوجههم، بنادم كيبانليك غادي وطايح عليه الضيم، مكانوش خايفين من كورونا بقدر مكانواخايفين على مصدر رزقهم والمجهول لي كيتسناهم، بالنسبة لبزاف راه الإغلاق التام قود من كورونا وأكثر ضرر عليهم، على شنو قيمة الحياة الى كان الواحد غادي يبقى عايش ولكن بلا مايلقى حتى عشا ليلة من بعد ماباع كاع حوايجو والأثات ديالو، وهادشي راه وقع لبزاف، أنا بشكل شخصي كنعرف ناس كانو خدامين ومقاتلين مع الوقت ولكن قاديين حاجة وبسباب الإغلاق وكورونا والتبعات ديالهم إظطرو أنهم يسعاو ويمدو يديهم للناس لأنهم مالقاو ماياكلو هوما ولادهم حرفيا، ماماتوش بالجوع طبعا ولكن راه ليس بالخبز وحده يحيى الإنسان، خاصو خبيز وزويتة وزبيدة وخضيرة للكاميلة وعديسة للغدا.
الواليد أيام الحجر الصحي كنت هاز ليه الهم وحتى هو دخلات معاه الوقت مع داك الإغلاق والسلعة لي وحلات فيهوراس المال القليل لي غادي ياكل منو، وجاب الله داك المساعدة ديال كوفيد راه عتق بيها الروح شوية ولكن طبعا مكانتش كافية غير هي حسن من والو، ولكنت ملي تهز الحجر خرج يقلب على راسو ورجع لفراشتو وراه كيجيب مصروف نهارو دابا وواكل شارب هو والأسرة ديالو، دابا ماهازش ليه الهم كاع خايف عليه من كورونا طبعا ولكن معتابرها مسألة زهر ووقاية وهادي هي الحياة معندو مايدير، ومرتاح من جيهتو ملي كنعرف انه خرج للسوق وصور نهارو، ولكن غير كنسمع ها الحجر الصحي راجع ىها الإغلاق الكامل فهاد المدينة أو ديك، كيرجع قلبي يتسد ونرجع نخاف ونتهول حيت الحزقة وقلة شي كتخلع كثر من كورونا.
