عمر المزين – كود///

بعد إشعار دولي كيهم السحب الوقائي لبعض دفعات الحليب المخصص للرضع من علامة BABYBIO، بسبب احتمال وجود مادة “السيريوليد” اللي كتنتجها بكتيريا Bacillus cereus، قام المكتب الوطني للسلامة الصحية للمنتجات الغذائية “أونسا” فورًا بإجراءات التحري واتخاذ التدابير اللازمة.

وبعد مراجعة دقيقة لوثائق الاستيراد، تبيّن باللي المغرب استورد غير جوج دفعات فقط من هاد المنتوج، وتم مباشرة حجزهم وإتلافهم تحت إشراف المصالح المختصة ديال أونسا، قبل ما يتعرض حتى شي منتوج موضوع السحب للبيع فالسوق الوطنية.

وكذلك خضعات، حسب المصدر نفسو، ثلاثة دفعات من المستحضرات الحليبية ديال علامتي “NAN OPTIPRO” و“NAN CONFORT” لسحب طوعي احترازي من طرف الشركة المعنية، وتم حجز هاد الدفعات وإتلافها وفق المساطر القانونية المعمول بها.

وفهاد الإطار، عزّز المكتب الوطني للسلامة الصحية للمنتجات الغذائية المراقبة التلقائية على مستوى نقط العبور بالنسبة لجميع المستحضرات الحليبية المستوردة من نفس الصنف، باش يضمن حماية صحة المستهلكين وسلامة المنتجات اللي كتدخل للسوق المغربية.