گود سبور//

يقدر يمشي الدولي المغربي عز الدين أوناحي من مارسيليا الفرنسي الصيف الجاي، حيث المستوى ديالو تراجع هذا الموسم وما بقاش قادر يحافظ على بلاصتو فالفريق.

وكشفت جريدة “ليكيب” الفرنسية الشهيرة، أن الدولي المغربي عز الدين أوناحي غيمشي بحالو من أولمبيك مارسيليا فالصيف الجاي، حيث ما كيلعبش مع الفريق بشكل منتظم، وأنه عندو عرض من البطولة السعودية كيفكر فيه، مع العلم أن الهلال السعودي حاطين عليه العين من الموسم الماضي وكانو هضرو معه فهاداك الوقت باش يلعب معهم ولكن اللاعب المغربي ما كانش معمر راسو بهم.

نفس المصدر، وضح أن الناس اللي قراب من عز الدين أوناحي كينصحوه باش يمشي يلعب فبطولة النگليز، فالوقت اللي أولمبيك مارسيليا باغيين يبيعو العقد ديالو خاص غير يجي شي عرض مزيان، مع العلم أن الفريق الفرنسي كانو سناو مع النجم المغربي فيناير 2023 لمدة 4 سنين ونص.